今季英超五項有趣既數據 精選 推薦

足球世界似乎乜都可以用數據解釋，數據可以拎黎評定一位球員成功與否，不過喺芸芸數項當中，有唔少都係比較有趣既，係大家諗都冇諗過既，我地不妨黎睇一睇今季五項有趣既數據，今次將會集中講下黎自英超既數據：

1. 舒活上任後，維拉用左兩個月就超過廿四場英超總入球
阿士東維拉於英超大半季既攻力都為人所垢病，踢左廿四場英超之後只得可憐既十二個入波，領導層最後將主帥林拔辭退，換上熱刺前領隊舒活。舒活上任後，只係用左三份之一—八場英超就已經超過左林拔時代，取得十三個入球，當中不乏大手交易既賽事，例如以4-0大勝新特蘭、3-3賽和QPR等，前鋒賓迪基狀態火熱，繼對QPR時大演帽子戲法之外，亦於對熱刺既賽事一箭定江山。

2. 史雲斯賣左邦尼之後，英超得分仲多過曼城
史雲斯前射手邦尼於15年1月14日以2800萬轉投曼城，正當大家都以為史雲斯會因攻力問題導致成績下滑時，史雲斯卻用成績證明佢地冇大問題。史雲斯自賣走邦尼後，截至15年4月15日於英超搶得17分，反之曼城卻只得14分，於英超奪冠之路越行越遠。邦尼於曼城得唔到太多既上陣機會，全季射入十球既佢只為曼城射入過一球。

3. 利物浦英超作客不失球紀錄
雖然利物浦最近連續敗於曼聯同阿仙奴腳下，以至跌出爭冠行列，而家就連爭前四都有難度，但佢地今季卻造出過一項唔錯既成績，就係九小時十九分鐘既英超作客不失球紀錄。佢地曾經於14年12月底開始作客接連迎戰般尼、新特蘭、阿士東維拉、愛華頓、修咸頓同史雲斯，並成功保持清白之身，一直到作客酋長球場先至被打破。

4. 阿古路既入球荒
阿古路今季既上半季表現火熱，首二十場比賽中入足十九球。不過幾乎每一位前鋒都會有低潮期，阿古路亦都唔例外，於三月迎黎佢既一個小低谷：喺成個三月入面，阿古路並未為曼城喺任何一項賽事中取得入球，頹勢甚至蔓延至四月，整個入球荒長逾五百分鐘，好彩佢喺曼市打比終於破入球荒，獨得兩球。相信曼城三、四月不斷失分既現象同阿古路狀態有莫大既關係。

5. 馬特菲臘斯助攻大爆發
大家未必會知道馬特菲臘斯係邊個，佢係一位QPR既中場，亦係之前對水晶宮射入世界波既嗰一位球員。原來佢除左遠射精彩之外，助攻都一樣得，踏入2015年之後，馬特菲臘斯已經交出左7個助攻，當中於對新特蘭同阿士東維拉既比賽中各交出兩個助攻，追平左德甲禾夫斯堡既迪布尼，並列第二，排喺兩位之前既係巴塞隆拿既美斯。踏入2015年後，美斯交出左八球助攻。

好文推介：五位於英超入波既門將

若然你鐘意「隨心寫足球」，不妨讚好本版facebook專頁，本版會為大家繼續送上好文:https://www.facebook.com/footballvoicehk

原文,經編輯