曼聯過去十年冬季收購球員排名

隨心寫足球 於 27/01/2015 發表 收藏文章
過去大約十年間,曼聯響冬季買過唔少球員,呢篇文章會將十名響冬季轉投曼聯既球員,以實力、名聲、表現同對曼聯既重要性做一個排名(最底第一名最重要):

10.董方卓(2004)
曼聯以350萬鎊從大連實德買入董方卓,當時呢位中國前鋒被譽為亞洲第一位超新星,但可惜佢苦無上陣機會,效力曼聯四年,只有一次為曼聯響英超入面上陣,亦都只係響季前熱身賽或對低組別球隊射入過幾球,最終被送返大連實德。

9.托錫(2009)
托錫於2009年1月2日正式由塞爾維亞球會柏迪遜轉投曼聯,但佢並未能響曼聯證明自己,呢位塞爾維亞翼鋒既速度未算超卓,而且體重太輕,未能響英超體力法比賽風格下生存,只為曼聯踢過兩場英超。後期被借去德甲科隆半季,科隆可優先以500萬歐元正式買斷,雖然托錫響德國表現出色,成功協助科隆護級,但科隆負擔唔到他既身價,托錫最後重返曼聯。2010年時托錫轉會至莫斯科中央陸軍,並效力至今。

8.文路祖(2008)
呢位安哥拉前鋒當時被曼聯助理領隊向費格遜推薦加盟,加盟初期由於未獲批工作證,而被轉借到彭拿典奈高斯,回到曼聯後只為曼聯響英超上陣一次,計埋其他比賽都只係上陣過三次,其後被借往侯城,再被賣去西甲華拉度列,並效力至今。
7.迪拿特(2009)
曼聯2009年時從史篤城簽入呢位比利時後衛,效力曼聯三年半間,只為曼聯響英超上陣三次,08-09英超賽季既煞科戰,曼聯對陣侯城,由於曼聯要留力踢歐聯決賽,迪拿特終於第一次為曼聯正選上陣,可惜最後傷出。2012年時,迪拿特轉投李斯特城,直到而家。

6.連迪加特(2011)
2011年時連迪加特以350萬鎊從挪超阿里辛特轉投曼聯,11-12球季既時候,由於正選門將迪基亞表現不種,連迪加特獲得上陣機會,上陣18次只失4球。現時仍然為曼聯後備門將既佢,合約將於2016年約滿。

5.域陀華迪斯(2015)
岩岩同曼聯簽左18個月合約既域陀華迪斯將會出任迪基亞既後備,雖然佢仲未為曼聯上陣過,但憑住佢既巴塞既經驗同表現,相信佢會比連迪加特更值得信賴,成為球隊既二號門將。

4.馬達(2014)
馬達轉會曼聯前效力車路士,係球隊核心,但摩連奴重新執掌車路士後,馬達明顯唔受重用,因而轉會曼聯,3710萬鎊既轉會費破左當時曼聯既轉會費紀錄。雖然馬達響為曼聯上陣既35場比賽中踢入11球,但佢仍然未成為曼聯既核心球員。

3.沙夏(2004)
沙夏2004年時以1240萬鎊由富咸轉投曼聯,並著上9號波衫。在效力曼聯既四年半時間入面,沙夏不斷受到傷患困擾,亦未能成為球隊必然主力,佢為曼聯一共上陣124場,射入42球,其後轉投愛華頓,踢過熱刺同新特蘭,而家已經掛左靴。

2.艾夫華(2006)
曼聯於2006年時以550萬鎊由摩納哥買入法國左閘艾夫拿,艾夫拿效力曼聯八年幾,成功贏去軒斯既位置,成為球會左閘主力,踢法以助攻為主既佢為曼聯贏過不少錦標,例如英超、聯賽盃同歐聯,曼聯生涯中佢為曼聯上陣過273場英超,響上年暑假轉投祖雲達斯。


1.維迪(2006)
由莫斯科斯巴達以700萬鎊轉投曼聯既維迪,加盟初期表示並唔係話好好,但適應期過後,佢成為隊史中其中一位最佳中堅,成功取代施維斯達,並與里奧費迪南拍擋踢中堅,佢既球風硬朗,頂頭鎚功夫了得,侵略性非常高,佢同艾夫拿一樣為曼聯贏得唔少錦標,為曼聯上陣英超211場攻入15球,上年夏季轉投國際米蘭。
若你鐘意「隨心寫足球」,請like以下專頁:https://www.facebook.com/footballvoicehk

原文
標籤: 英超  曼聯  

留言


請按此登錄後留言。未成為會員? 立即註冊
    快捷鍵:←
    快捷鍵:→