十年之黎轉會費支出最高嘅十位名帥(上)

隨心寫足球 於 28/05/2015 發表 收藏文章
足球世界無時無刻都充滿住轉會傳聞,當轉會窗一開,整個足球世界都會充滿住不同嘅轉會消息。近年黎,足球世界都出現通漲,幾千萬鎊嘅轉會可以話係比比皆是,而且不斷有球員轉會刷新紀錄,例如查維馬天尼斯、侯克、迪馬利亞分別成為德甲、俄超、英超最貴收購,又例如大衛雷斯成為身價最高嘅後衛等等。有唔少人都會稱讚波圖呢一類透過轉賣球員而獲暴利嘅球隊,但大家有冇諗過邊位領隊最肯俾錢?我地睇睇呢十年之黎支出費最高嘅十位名帥,今集先睇五位:

10. 艾歷尼
艾歷尼以往只係一個默默無名嘅領隊,出道時只係執教意大利第四級聯賽嘅球隊,2007年時,佢執教當年仍然喺第三級聯賽嘅薩斯索羅,開始佢扶搖直上嘅執教生涯。之後一季,佢就被意甲嘅卡利亞里任命為領隊,雖然卡利亞里缺乏資源同頂級球員,但喺艾歷尼嘅帶領下,佢地仍令人驚喜地以第九位完成賽季。

打出名堂嘅艾歷尼之後執教AC米蘭,為佢地帶黎左一個意甲冠軍同意大利超級盃冠軍,艾帥現時執教意甲班霸祖雲達斯,今季已奪兩冠,並帶領球隊以黑馬姿態晉身歐聯決賽。

呢十年黎,佢喺轉會市場投入左2億2400萬鎊,買入球星包括莫拉達,羅賓奴及奇雲保定等。

9. 羅渣士
位列第九嘅羅渣士,雖然於2008年先正式執起教鞭出任領隊,但佢至今已經合共大花2億6200萬鎊。

羅渣士08年執教屈福特,喺一季過山車式嘅排名起伏過後成功以中游成績完成賽季。之後,佢轉而執教以前球員年代曾經效力過嘅雷丁。轉會之前,羅渣士曾經向屈福特表忠心,所以屈福特球迷對羅渣士可以話係又愛又恨。羅渣士領軍嘅雷丁成績差劣,最後佢亦被炒。

其後英冠史雲斯向佢招手,佢亦不負所托帶領史雲斯成功升上英超,佢優秀嘅執教表現吸引左利物浦嘅目光,最後利物浦於12年"抱得美人歸",羅渣士亦一齊執掌紅軍至今。

佢買入嘅球星包括巴路迪利,米努列,安利簡等等。

8. 雲高爾
荷蘭名帥雲高爾喺呢十年黎曾經於荷蘭、德國同英格蘭渡過,先後執教過阿爾克馬爾,拜仁慕尼黑,荷蘭國家隊,同埋曼聯。

執教阿爾克馬爾嘅頭幾年,雲高爾一直與冠軍無緣,拎過聯賽第二第三,荷蘭盃第二,而喺07-08年嘅賽季,阿爾克馬爾於聯賽更只以讓人失望嘅第十一名收尾。雲高爾打算離隊,但隊中卻有球員挽留,佢就願意留低同球員們再打拼一季,最後該季贏得荷甲冠軍。

其後佢轉投拜仁,提拔過艾拿巴同梅拿等新星,亦喺10年讓拜仁成為聯賽,德國盃,德國超級盃三冠王,唯喺歐聯決賽不敵有盧斯奧倒戈嘅國際米蘭。

今季入主曼聯雲高爾大手入貨,包括梳爾,迪馬利亞,佢嘅戰利品名單入面仲包括阿爾克馬爾買入嘅柏利(現效力修咸頓), 同埋洛賓。

7. 哥迪奧拿
哥迪奧拿執教地上最強同宇宙最強之下奪獎無數,喺邊度教波就掃哂該國所有錦標,亦贏過歐聯,歐洲超級盃等歐洲賽獎項。

恰巧哥帥執教過嘅兩間球會都出名一樣野,就係青訓,巴塞有沙維,恩尼斯達,域陀華迪斯;拜仁則有拿姆,舒韋恩史迪加同艾拿巴。

儘管兩間球會都出產過唔少優質青訓產品,但收購國內精英同頂級外援對球會實力黎講係同樣重要,所以哥迪奧拿亦買入過唔少來自其他球會嘅球員,包括伊巴謙莫域,韋拿,堤亞高艾簡達拿同巴拿迪亞,總金高達4億100萬鎊。

6. 費格遜
排喺第六嘅係已退休嘅前曼聯領隊費格遜,相信筆者都唔使多介紹佢,佢既傳奇地位絕對係無人能比,十年前佢已經執教左曼聯接近廿年,近呢十年佢贏過五次英超、三次聯賽盃,仲有一次歐聯。

費格遜十年黎總使費高達4億400萬鎊,可以話喺使錢方面絕對唔會姑寒。曼聯同拜仁巴塞一樣都出產過唔少高質既青訓產品,包括當時既七小福等人。不過自2004年起,費格遜增加投放喺轉會市場上既籌碼,買入過唔少球星,當中包括朗尼、雲佩斯同迪基亞等等。

我地遲啲會睇埋最後五個。

若然你鐘意「隨心寫足球」,不妨讚好本版facebook專頁,本版會為大家繼續送上好文:https://www.facebook.com/footballvoicehk
大家睇左延伸閱讀既文未?未就睇完呢篇快啲睇下喇,多謝支持~


留言


請按此登錄後留言。未成為會員? 立即註冊
    快捷鍵:←
    快捷鍵:→