哈化柏林前鋒接近離隊，經理人暗示其將加盟多蒙特 精選

多蒙特前鋒利雲杜夫斯基今季係德甲打進15球助攻10次，仍然係球隊不可或缺既核心人物，而除左利雲杜夫斯基，替補前鋒人選都不堪大用。正因如此，想填補利雲夏天離開以後既空缺，多蒙特既任務相當艱鉅，唔止要搵到利雲既接班人，係鋒線陣容既厚度上都需要進行補充。係大黃蜂既尋槍名單上賓施馬，迪斯高，迪亞高哥斯達咁既大牌球星赫然在列，不過哈化柏林既前鋒拉莫斯係目前同多蒙特走得最近既一人。
拉莫斯今季表現出色，德甲攻入15球助攻6次，同利雲並列射手榜第二位。身體條件出色，射術精湛又熟悉德甲既拉莫斯非常符合多蒙特既要求，之前《圖片報》曾經報導拉莫斯同多蒙特高層密會，雙方基本敲定左轉會細節，拉莫斯既身價將會係800到1000萬歐元之間。
根據《圖片報》最新既報導，拉莫斯經紀人係接受哥倫比亞新聞社採訪時表示：「拉莫斯加盟多蒙特既可能性非常大，我諗都係令兩間球會自己黎最後宣布啦。」佢最後一句話都係度暗示雙方已經達成左一致，只係等最後選擇合適既時機公佈。多蒙特主帥高普都係上年12月對陣哈化柏林果陣表達左對拉莫斯既欣賞：「拉莫斯一直以黎都係一名出色既球員，非常難防守，因為佢非常靈活。」
雖然拉莫斯係對多蒙特好好既補充，但係對於大黃蜂黎講，拉莫斯作為利雲既接班人顯然仲係有啲級數唔夠，係同多蒙特傳出過緋聞既球員中，迪斯高，賓施馬，迪亞高哥斯達都係令球迷感到興奮既名。迪斯高係曼城過得並唔如意，佢本人都表示過並唔排除重返德甲，不過薪水係佢加盟多蒙特既最大障礙；之前曾經有媒體報導皇馬希望用賓施馬交換根度簡，不過根度簡長期既傷停可能會令皇馬重新考慮；西班牙鋒霸哥斯達今季狀態火熱，不過多蒙特想得到佢將會面臨激烈既競爭。到底夏天邊個會成為利雲既接班人，我地拭目以待。