《謝師宴上的毒撚;球場上的獨撚》

足球說故事 於 19/05/2015 發表 收藏文章

謝師宴上,係一眾靚仔靚女於鎂光燈下show off嘅好時機,毒撚係呢個時候,絕對係無地置容,唯一方法,就係唔好出現,又或者行開啲啲唔好咁明顯。雖說毒撚出唔出現其實都唔會有人發現或者在意,但攝影師的鏡頭下,一切都會無所遁形。


巴塞在尾二一周的比賽,作客1:0擊敗馬體會,成功在事隔一年後重登西甲寶座,一錘定音嘅美斯再次成為功臣。鎂光燈下,美斯仍舊係焦點,猶如謝師宴上嘅萬人迷男生,個個都爭住同佢影相合照。但諗都無諗過,事後媒體焦點竟不在美斯身上,也不在其他兩位成員阿s同阿n身上,而係係呢個今季零上陣嘅華美倫身上.....


華美倫,季初以1900萬鎊歐元加盟巴塞隆拿,望以取代退隊的佩奧爾。但係人都知華美倫近年受傷患困擾,早已係阿仙奴無正選,只做個掛名隊長,而就算有機會落場,表現都係乏善足陳,所以諗都諗唔到點解巴塞會睇中咗華美倫。華美倫一夜間,由倫敦飛到加泰隆尼亞;由阿仙奴跳級到更高層次嘅巴塞隆拿,兼同蘇亞雷斯、尼馬、美斯、沙維、小白呢啲重量級球員做隊友,地位不跌反升,真係始終不及。


但更始料不及嘅或者係華美倫嘅傷患康復程度。過去日子一直養傷,由幾星期變幾個月,幾個月變半年,轉眼間黎到季尾都仲未上演自己嘅處子戰,唔好怪球迷真係遺忘咗華美倫嘅存在,而昔日帶刀侍衛嘅稱號早已隨轉會巴塞隆拿之後慢慢被除名。

今日嘅華美倫,已經成為玻璃戰士。


望住其他巴塞球員著曬波衫波褲波鞋波襪,後備都叫做著下運動裝,但望住華美倫上身著波衫,下身卻著住一條同運動格格不入嘅牛仔褲,猶如一個t-shirt短褲白襪仔的毒撚混入了一班高富帥的男人堆中,真係萬綠從中一點紅。對球迷黎講,呢個係正常配搭;但對於一個足球員黎講,絕對係一個錯置配搭,有邊個球員想係比賽期間著住呢套裝束呢?著得呢套裝束,就證明自己嘅地位真係好渺小。


今日嘅華美倫,成為了球場上嘅獨撚。係獨撚,而唔係毒撚,因為由始至終,無得落場同隊友比賽並唔係華美倫嘅能力不濟,而係傷患嘅纏繞同折磨,命運愚弄。不過,一班毒撚表示,自己又何況唔係並命運愚弄呢?若果唔係提早奪冠,有得落場同球迷揮下手,真係未必記得起華美倫呢個球員,而最後嘅大合照,卻諷刺地成為了華美倫今季最美好嘅回憶。
雖然合照上華美倫表現得幾開心,但從華美倫嘅企位中睇得出,華美倫同一班正選球員真係有種無形嘅隔膜。上年阿仙奴拎足總盃企最前拎獎盃,今季係巴塞拎獎,只能企在邊邊一旁做下襯托。不過樂觀啲諗,有份一齊合照,已經比毒撚好,至少佢唔似毒撚咁比人遺忘啊。但世事嘅野你真係估唔到,因為你點估到呢一刻,華美倫竟然成為了報章上的一個焦點。

「華美倫零上陣 贏得西甲冠軍」
「華美倫為雲加額外賺得380萬」
「1900萬鎊賣華美倫 雲加計數計得盡」
「人生贏家?巴塞玻璃人一場未踢或可得歐冠獎牌」

一係無人提,一提就成為主角,完完全全係謝師宴上的毒撚的另一寫照。不過,球迷係取笑華美倫時,諗深一層,華美倫真係好慘。做足球員除咗為錢,亦係為咗延續自己對足球嘅熱情,有邊個球員想每星期都只能坐係場邊睇住隊友比賽?有得落場,就算得1分鐘我都願意,但偏偏受傷嘅華美倫連1分鐘機會都無。


昔日同為阿仙奴舊將的希比講過:

「當你一直坐在冷板凳上的時候,即使奪得了冠軍獎盃,獲得的喜悅也只是少之又少。相反,在阿仙奴即使沒有奪冠,但我在場上真實的拼殺過,那種感覺真的很好。」

如果你明白當中道理,你就知道雖然擁有此等榮譽,但當中卻無份為那份榮譽出過一分力,個份滿足感真係可以話係零。有牌拎係開心嘅,但乜野都無付出過又好難好開心,除非你係free rider喇,如果唔係你應該會感到好唔好意思,更何況華美倫自己都唔想。


見住華美倫由昔日帶刀侍衛,變成今日球場上一個傷極都未傷好嘅毒瘤,作為阿迷見到前隊長咁真係好唏噓。華美倫個樣,一啲都唔毒,仲同祖迪羅(Jude Law)有幾分相似,絕對係型棍子一名,真係點可以自我放棄甘願做一名毒撚呢?


希望你真係快啲好番,投入操練,唔好再做獨撚喇!!!!!!


‪足球說故事@http://facebook.com/footballtellstory

留言


請按此登錄後留言。未成為會員? 立即註冊
  • Won 於 19/05/2015 評論 NO. 1

    無地自容啊大佬

  • cx007 於 19/05/2015 評論 NO. 2

    做人唔好咁盡,寫野唔好寫咁毒!

  • 老lin 於 19/05/2015 評論 NO. 3

    佢真係好慘

快捷鍵:←
快捷鍵:→