《當年我地一齊係亞視睇歐聯》

足球說故事 於 04/04/2015 發表 收藏文章


作為香港人,亞視執柒咗,我係會熱烈地彈琴熱烈地唱,但作為球迷,我唔會忘記佢當年帶給過球迷嘅些小恩惠......




想當年嘅歐聯夜,球迷唔洗上網乞link,只需要坐定定到時間就扭去二字台就會免費睇到直播,仲要有個講波唔錯嘅丁偉傑做球賽旁述,由凌晨三點幾陪到你天光,那些年嘅亞視和丁偉傑,真係球迷嘅天大恩物。



但自從06年之後,歐聯播映權已經唔再屬於亞視,球迷已經唔再可以免費地收看歐聯,同時亦無得點再聽到丁偉傑講波。無咗歐聯,亞視都仲有個蘇超,但蘇超呢啲次級聯賽又有幾多球迷留意?


之後就一直沉寂咗好幾年。去到上年,亞視竟投放不少資源去足球到,蘇超、港超及某些球隊熱身賽,雖然吸引程度唔算高,但都叫做有番啲野睇。好記得個陣播利物浦對多蒙特嘅熱身賽,大家都好想睇。就算你幾唔鍾意亞視,你都會因為足球而扭去呢個不如執柒咗去好過嘅電視台,仲會笑鳩佢啲powerpoint嘅數據分析,但有一刻球迷竟與亞視敵為友,更建議亞視改行主力轉播足球賽事。


但講到最深刻,點會唔係當日有份唱生日歌嘅岩布仙尼?

https://www.youtube.com/watch?v=tL3qhZQJk7E

一個足球狂熱,令一班由唔睇亞視,甚至一直屌亞視嘅人都會特登扭去亞視睇波,可想而知,免費波嘅吸引係有幾咁大,但最重要嘅都係場波嘅吸引性。不過啊,一切都成過去,亞視終於如大家所願執柒咗,大家唔會再睇到亞視啲柒事,唔會有人夜晚仲講把酒當歌,或者叫你睇下高志森個微博;亦唔會再播無咩人睇嘅蘇超港超,唔會再直播搵人唱生日歌,更加唔會再重播N年前嘅綜藝節目,一切都已經成為歷史。



當某些事走到盡頭時候,你才會慢慢憶起以前他的一切,係懷念又好,係記得又好,咪當係佢最後一程嘅小小回憶。作為香港人,亞視執柒咗,我係會熱烈地彈琴熱烈地唱,但作為球迷,我唔會忘記佢當年帶給過球迷嘅些小恩惠。

http://facebook.com/footballtellstory



留言


請按此登錄後留言。未成為會員? 立即註冊
    快捷鍵:←
    快捷鍵:→