《來自外星的你》

足球說故事 於 22/04/2015 發表 收藏文章


回想起當年朗拿度嘅嚴重傷患,膝蓋粉碎性骨折、右膝十字韌帶完全斷裂、左膝十字韌帶斷裂,一次十字韌帶撕裂都足以令球員立刻告老歸田,而他卻偏偏經歷了兩次......


第一次撕裂,人人都話佢會即刻退役,但經歷一年半時間又告復出;復出之後,好多人都認為佢唔可能回復昔日嘅水平,但佢卻用一個球季和一次世界盃證明了自己不只回復了昔日水平,甚至這刻比以前更加強勁。佢能夠復出可能係一個奇蹟,而能夠更上一層樓,係奇蹟之中嘅奇蹟。

佢,真係一個痴線佬。


然而2008年,佢再一次不幸地連左膝十字韌帶也斷裂,個陣時佢已經32歲。



一個老將面對咁嚴重嘅傷患,人人都估佢會就此掛靴,但係佢竟然同人講:「我唔會掛靴,仲想繼續踢波!」最後佢真係好順利咁回歸球場。


佢,唔單只係一個痴線佬,更係一個在玩命嘅痴線佬!

但係,我LIKE。



足球一直係佢最愛,無論佢點俾人鬧掛住食女,點俾人笑痴肥,佢依然係咁鐘意足球,仍然好想繼續享受足球,但係佢知道,始終有一日會退下來。2011年,佢終於選擇脫下著咗18年嘅戰靴。


「在過去兩年時間裏,我每天都在忍受傷痛的煎熬,但現在,我終於體會到了離別的滋味,我將一生獻給了足球,但我毫不後悔,它太美妙也太精彩。」

雖然佢退下來個陣無劉翔咁咁轟動中國十多億人,TVB亦無為佢製作乜野專題特輯,但係係無數球迷眼中,佢宣佈退休個陣,無一不感到可惜,儘管早已知道佢退下來是不久的事,但係當呢一日真正來臨時,先前所有嘅心理準備,到那刻其實一啲用都無。


4年過去,呢4年,佢依舊活躍於足球界,即使退休都仍然離不開足球,甚至有消息話佢將會復出,但係一切都只係聞樓梯響。不過最近,真係見到佢回歸球場,不過只為慈善賽。


望住呢個肥胖嘅身影,不多不少是帶著半點唏噓,唏噓在明明因甲狀腺問題而導致肥胖,卻被人誤會為因為懶散、生活不檢點、不斷食女所致;更加唏噓在明明係一個超級好波擁有極高成就嘅球員,卻經常被傷患偷去了不少光陰,但係當我見到佢穿起球衣換上球鞋在場上打拚時,我突然又有另一種感覺。雖然佢已經唔係好似以前咁高速盤扭,逢人過人,但係呢一刻我仍然見到一個曾經連行步路都成問題嘅人,到今天竟然可以繼續在足球場上馳騁,個一刻我先發現,呢種感覺唔係一種唏噓,而係一種安慰。

係肥咗啲,慢咗啲,腳法生疏咗啲,但係至少都仲可以欣賞到佢嘅英姿啊。


或者對於好多人黎講,朗拿度呢個名已經由C朗拿度所取代,講起朗拿度,你首先諗起嘅未必係巴西個位;在GOOGLE IMAGE輸入RONALDO時,彈出來嘅關聯照片90%都係C朗拿度。


但係對於不少球迷,包括我,朗拿度由始至終只有一位。



我未必係睇住朗拿度由火星空降在地球上,但佢嘅足球卻一直深深影響住我,亦陪伴住我走過了我的青春歲月,無可否認係呢個外星人令我更加喜歡足球。而無論時代怎變,光陰怎變,朗拿度在我腦海中,仍舊不變,一樣都係咁好波,咁好扭,咁R9,咁外星人....


GOAL~~~~~~~~~~RRRRRRRRRRRRRRRRRRRRRRRRRRRRRRRRRRRRRRRRRRRRRRRRRRRRRRRRRONALDOOOOOOOOOOOOOOOOOOOOOOOOOOOOOOOOOOOOOOOOOOOOOOOOOO~~~~~GOAL~~~~~~~~~~~~~~~~~~~~~~~~~~~~~~~

足球說故事@http://facebook.com/footballtellstory


留言


請按此登錄後留言。未成為會員? 立即註冊
  • Tsang Jimmy 於 22/04/2015 評論 NO. 1

    只要有空間,話抽就抽,一抽就係靚抽

  • Jackiefx 於 22/04/2015 評論 NO. 2

    搵C朗同R9比,未免太抬舉........C朗喇

  • 樂爺 於 22/04/2015 評論 NO. 3

    Cr7 just shit....點同肥哨比

  • 樂爺 於 22/04/2015 評論 NO. 4

    Cr佢條柒啦

  • 樂爺 於 22/04/2015 評論 NO. 5

    朗拿度係唯一可以令我放棄洛賓號球員

  • 樂爺 於 22/04/2015 評論 NO. 6

    如果佢復出,佢去邊隊我就撑邊隊

  • LeoHim 於 22/04/2015 評論 NO. 7

    c朗嘅名字,巴爾嘅速度,尼馬嘅盤扭,美斯嘅變速。神也

  • jasonwkc 於 23/04/2015 評論 NO. 8

    佢快推個波極黐腳,快推過你又得,禁區內搵位又得,自佢以後見唔到個咁全能的前鋒

快捷鍵:←
快捷鍵:→