【巴塞靚女熱血球迷專訪:追尋細哨的故事】 圖片

波事春秋於 26/02/2017 發表 收藏文章

日前細哨去海南島出席活動順道訪港,有位超級熱情嘅靚女球迷全程追蹤,最終意外收獲同細哨單獨影相簽名拍片,絕對有今生冇來世,佢就係Barça旅孩嘅Nicole!我地邀請左Nicole訪問呢次球迷奇遇記經歷,同埋鍾情巴塞嘅心路歷程!(Nicole鍾意巴塞嘅原因仲好浪漫架)

波事春秋:從何得知細哨訪港呢?

Nicole:我朋友有份幫手呢個活動,而我亦知道有呢個活動就自己問佢我可唔可以參加,而我都用左傳媒同公關身分去出席呢個活動。


波事春秋:知道消息之後有咩準備?駛唔駛特別請假呢?

Nicole:知道之後都特登上網訂機票過去,我就咁岩放緊兩個星期大假,所以唔使特別請假。係出發之前一晚我都搵下波衫同埋之前係魯營買既紀念品,希望可以俾佢簽到名。


波事春秋:追蹤細哨嘅過程順唔順利呢?中途遇到咩阻滯?

Nicole:都幾順利,第一日中午已經喺媒體見面會見到細哨,另外喺一個細哨同小球迷互動嘅環節已經著左波衫準備俾佢簽名,但太多人圍住埋唔到去,果晚都以為佢第二朝會好早走,下午返到酒店又見到細哨仲擦身而過,但佢仲係工作緊,所以就算喺隔離都唔想打擾佢,淨係拎住支旗俾佢見到。

第二日宣傳活動(簽約儀式),見細哨喺台上有啲悶,所以我就喺台下係咁揮手同俾個6字手勢嘗試同佢互動,細哨都有望到,之後儀式完左離開嘅時候冇估到細哨會行近,於是我就係咁「揚」件波衫,而細哨竟然又真係行過黎簽名!


但最大嘅阻滯就係支簽名筆,因為冇諗到細哨會過黎所以冇搖好,令一開始個簽名好模糊同簽得唔齊(見圖),但佢行過黎一刻我已經超緊張,個心跳到痴左線!然後後面有人將我拉後因為想上前,但因為要拎返件波衫,於是我又好努力咁爬返上前拎返件波衫,拎返雖然見到簽名好朦,但總算簽到啦!

波事春秋:最後終於遇到細哨,見到偶像一刻有咩感覺?細哨係咪好友善?

Nicole:我坐下午機返香港,其實未去到機場已經聽聞佢同我同一班機,但我冇諗過係真,去到機場見到巴塞主席同佢握到手,之後細哨出黎,巴塞主席好nice咁問我想唔想同佢影相呀?但其實我一見到細哨已經捉住佢selfie同攬左佢一下,又同佢傾左兩句兼俾埋剩低嘅波衫、旗同埋精品俾佢簽名,不過巴塞主席又好nice咁問,於是我地就三個一齊影左張合照喇!巴塞主席全家(佢太太同個仔)都好nice架~

之後等出境,細哨咁岩喺正隔離排隊,咁我就facebook開live,點知佢又好配合,又say hi又過黎一齊影一齊笑(見片)!之後我就好似跟蹤狂咁跟住佢地,而細哨就算去左Lounge度坐都同我揮手,佢助手仲過黎拎埋我剩低嘅精品俾佢簽名,令我實在超開心!!


我覺得作為一個巴塞球迷,呢個體驗真係完全無憾!因為細哨簡直任我影任我簽,而我亦聽到香港球迷等到細哨6點幾轉機都影到相簽到名,我都為佢地開心!細哨同佢班crew都好nice,好肯俾你簽名(當然係非工作時候啦!)。

所以回程自費買機票真係好值得,同一班機雖然坐得好遠,但我見到佢上機、沿途又影相拍片簽名仲好close,我都毫不掩飾對佢嘅愛一下攬過去佢都唔介意,實在非常之開心!

之後觀瀾湖巴塞會有足球基地,亦會開個mega store,球迷可以去果度買野都得,不過要睇比賽當然要去魯營啦!

波事春秋:細哨係咪你第一個親身接觸嘅巴塞球星?黎緊有冇計劃繼續追蹤其他球星?有冇追星tips分享下?

Nicole:係呀!其實我前年已經去過魯營,但當時休季冇見到球星。至於追星tips,我覺得唔好喺佢地做緊正經野嘅時候打擾佢,唔好破壞左佢地做野嘅mood,佢地見到你尊重佢,都會好樂意幫你。黎緊如果有巴塞球星黎,而時間地點又夾得岩,我當然會繼續追星啦!
< 1 2 >
標籤: 巴塞  巴塞隆拿  歐聯  西甲  細哨  

留言

會員
我要評論
請按此登錄後留言。未成為會員? 立即註冊
  • Chiuchiu Waiwai
    Chiuchiu Waiwai 於 26/02/2017 評論 NO. 1

    放開细哨吖.:-P

  • Cocomalaso Lee
    Cocomalaso Lee 於 26/02/2017 評論 NO. 2

    我要带她走,我怀疑她是皇马的间谍!

  • 馮嘉銘
    馮嘉銘 於 26/02/2017 評論 NO. 3

    唔好整污糟細哨丫😠

  • Mario Ho
    Mario Ho 於 26/02/2017 評論 NO. 4

    放開細哨!

  • Ar Ho
    Ar Ho 於 26/02/2017 評論 NO. 5

    Carmen Har幾時上報到你追美斯

  • Raven Mo
    Raven Mo 於 26/02/2017 評論 NO. 6

    Hoiian Ho 識做啦

  • Wai Ho Yip
    Wai Ho Yip 於 26/02/2017 評論 NO. 7

    幾靚女條女
    做佢條女
    唔洗做
    日日有朱古力

  • Hok Kam Yau
    Hok Kam Yau 於 26/02/2017 評論 NO. 8

    葡萄細哨

  • Yin Hang Chan
    Yin Hang Chan 於 26/02/2017 評論 NO. 9

    靚女球迷咪會有專訪囉,做相同既野如果係個四眼暗瘡肥婆球迷根本唔會有人知,唔會有人有興趣探討心路歷程...😃

  • Sea Tau
    Sea Tau 於 26/02/2017 評論 NO. 10

    球迷會圍內既人緊係知道朗拿甸奴行蹤啦,我地的平凡人都唔知佢來左香港,到走埋見到曬命相先知😡

  • Jivan Lam
    Jivan Lam 於 26/02/2017 評論 NO. 11

    深入專訪

  • Joe Mak
    Joe Mak 於 26/02/2017 評論 NO. 12

    這些機會…

  • Elvis Lam
    Elvis Lam 於 26/02/2017 評論 NO. 13

    有啲似陳爽

  • Mike Sze
    Mike Sze 於 26/02/2017 評論 NO. 14

    入房慢慢問

  • Tsang Kwong Yip
    Tsang Kwong Yip 於 26/02/2017 評論 NO. 15

    細哨已經全身深入地徹底檢查過呢位小姐,完全發現唔到任何皇馬間碟嘅蛛絲馬蹟!

  • Kaka Ling
    Kaka Ling 於 26/02/2017 評論 NO. 16

    球迷⋯⋯

  • Chun Cheong Mak
    Chun Cheong Mak 於 26/02/2017 評論 NO. 17

    真心想同細哨影相

  • Philip Jim
    Philip Jim 於 26/02/2017 評論 NO. 18

    放開個女仔

快捷鍵:←
快捷鍵:→