世青盃6大必睇新星！ 精選

聽日世青盃就會喺南韓開波，如果大家好似雲加咁鍾意睇後生仔踢波嘅就唔好錯過，而家先同大家睇吓有乜焦點新星！

英格蘭：效力車路士嘅蘇蘭基(Dominic Solanke)被認為喺英格蘭嘅前線希望，今季雖然未有喺一隊上陣，但之前外借荷甲維迪斯時已經喺球隊必然正選。代表過英格蘭各支青年梯隊嘅佢攻入超過24個入球，亦帶領過英格蘭U17拎過歐洲少年錦標賽冠軍，絕對喺今次嘅神射手大熱門！


日本：只係得15歲嘅久保建英(Takefusa Kubo)已經可以代表U20出戰世青盃，佢仲喺今屆比賽第二細嘅球員。不過呢位小將早前已經喺日聯盃上陣，踢職業賽事嘅經驗可能已經多過唔少對手，綽號「日本美斯」嘅佢絕對值得大家去留意！


南韓：日本有美斯，佢哋嘅宿敵南韓都有。效力緊巴塞B隊嘅李昇祐(Lee Seung-woo)就係「南韓美斯」。李昇祐曾經同久保建英做過隊友，不過佢就無返到自己國家發展，繼續留係西班牙等待機會。19歲嘅佢喺南韓小國腳嘅攻擊主力，相比起久保健英佢嘅出場機會應該更加多！

美國：德國出生嘅施拿林(Gedion Zelalem)曾經喺德國小國腳，不過喺美國成長嘅佢最尾變節改為效力美國。2013年佢被雲加 賞識加盟阿仙奴青訓，仲即刻喺盃賽有上陣機會。外借幾季後今年佢終於重返一隊，亦係聯賽盃有2次上陣，相信佢會係今次美國嘅中場大將。


法國：講起法國，大家應該會留意巴黎聖日耳門嘅前鋒奧古斯甸。其實佢哋另一位前鋒馬古斯杜林(Marcus Thuram)都好值得留意，因為佢就係法國1998年世界盃冠軍功臣杜林嘅仔仔。「名將之後」嘅佢無好似爸爸咁以後衛身份上陣，反而成為前鋒為球隊爭取入球。踢緊法乙索察嘅佢今季都有唔少上陣機會，就睇下佢可唔可以同奧古斯甸一齊合作攻破對手大門啦！

意大利：文達高拉(Rolando Mandragora)雖然只係得19歲，但早喺2014年已經有意甲上陣經驗，之後亦幫過佩斯卡拉升班，而家就踢緊班霸祖雲達斯。今季佢上陣機會唔多，不過佢就一直都係意大利小國腳嘅主力，相信嚟緊都會喺球隊嘅世青盃重心球員！



如喜歡不同的「球員‧故事」請like這專頁，鼓勵我寫下去，謝謝支持！
https://www.facebook.com/footballerstory