【寶刀未老】果然係荷蘭神鋒!雲佩斯後備入替50秒即入靚波

睇足365 於 09/02/2018 發表 收藏文章
年紀大咗,身體機能係會下滑,不過對於一個曾經嘅球壇頂級射手嚟講,技術同把握力依然喺度。荷蘭射手雲佩斯,喺正式宣佈退出國家隊之前,近年就算年紀漸大,而且只係喺土超踢波,仍然頻頻入選,佢最近回歸荷甲,又有好表現。


雲佩斯喺2004年離開飛燕諾,加盟阿仙奴,雖然經常受傷,但仍然得到雲加重用,並成功由翼鋒轉型為中鋒,佢喺2011-12球季擺脫傷病打足全季,馬上以隊長兼主力射手身分撐起兵工廠,以30球成為英超神射手,同時當選英格蘭球員先生。球季結束之後就轉投曼聯,兼取得聯賽冠軍。

今個冬季轉會窗,34歲嘅雲佩斯離開效力三年嘅土超勁旅費倫巴治,回歸由前槍手雲邦賀斯執教嘅母會飛燕諾。


喺荷甲比賽中,飛燕諾主場近戰格羅寧根。比賽77分鐘,雲佩斯後備上陣,當時飛燕諾領先2-0。上陣不足一分鐘,雲佩斯喺禁區內接波,回傳俾隊友後走位,再次接應隊友傳送,乖巧避過一名守將,隨即拗腰射遠柱破網。

https://i.imgur.com/nqiscos.gif
loading

雲佩斯回歸荷甲之後,四場比賽同樣喺比賽末段後備上陣,呢一球係佢今次加盟以嚟第一球,距離上一次為飛燕諾入波,足足13年!


Source: Daily MailGoal
標籤: 荷蘭  雲佩斯  阿仙奴  曼聯  費倫巴治  飛燕諾  

留言


請按此登錄後留言。未成為會員? 立即註冊
    快捷鍵:←
    快捷鍵:→