「防守專家」高基連恨球王波衫，示範如何完美「mark死」美斯

正如英格蘭名宿連尼加話齋，美斯真係好似好難mark，佢最近話有美斯喺場上面嘅時候，巴塞就好似有13個球員喺場上面咁，難以抵擋。美斯係就係成日散步，但佢一發威真係可以一個扭幾個兼入埋波，有見及此，前阿仙奴中場高基連就諗到一條「妙計」。

最近啱啱踢完嘅西班牙國王盃四強次回合中，華倫西亞主場迎戰巴塞隆拿。華倫西亞喺首回合作客以0-1敗陣，今仗返回主場出擊，都係難逃一敗。

喺比賽嘅37分鐘左右，巴塞一次攻勢推進到華倫西亞嘅禁區頂附近，今個冬季轉會窗由阿仙奴加盟嘅高基連，一向攔截力強，所以佢今仗有唔少貼身招呼美斯嘅鏡頭，雖然mark美斯通常都係失敗居多（都好正常），但今次佢真係成功由美斯腳下搶到個波。不過當美斯想轉身追返個波嘅時候，離奇嘅事就發生咗。


喺短短一瞬間，佢竟然除咗美斯件衫，唔係扯爛，而係「清脆」除出嚟，搞到美斯搶唔返個波。佢「清脆」同瞬雷不及掩耳嘅程度，係就算球證就喺面前，都冇吹犯規！唔知喺阿仙奴時期已經同美斯交過手嘅高基連，係咪好想要美斯件波衫呢？

https://i.imgur.com/HHbL6vQ.gif

阿仙奴喺歐聯遇過巴塞好多次，高基連可能由嗰時開始就諗緊點樣「mark死」美斯，結果練成呢招超技術。

不過超技術都冇用，最終巴塞喺比賽中憑古天奴及拉傑迪各建一功，蘇亞雷斯獻出兩個助攻，以2-0取勝，總比數贏3-0晉身決賽。

相關影片：
https://www.youtube.com/watch?v=9WnBHJf62W0
Source: Metro、GiveMeSport