突傳阿仙奴報價大衛雷斯,雲加開腔回應多宗轉會傳聞

睇足365 於 02/01/2018 發表 收藏文章
車路士中堅大衛雷斯近期失去主力位置,更有傳佢同領隊干地鬧翻,頗有機會喺1月轉會窗期間離隊他投。早前曾經傳出皇家馬德里同祖雲達斯等球會對佢有興趣,但近日突然爆出同市死敵阿仙奴係佢下一站嘅大熱門。


已經係第二次效力車路士嘅大衛雷斯,喺上一季係車路士奪得聯賽冠軍嘅防線核心,不過佢今季就不受重用,上一次上陣已經係11月22號歐聯對卡拉巴克。喺聯賽方面,佢暫時只係上陣8次,除咗有傳佢同領隊干地不和之外,亦都已經報稱受傷好一段日子。


一直未有同大衛雷斯拉上關係嘅倫敦鄰居阿仙奴,近日突然被傳媒擺上枱,話係大衛雷斯下一站嘅最新大熱門。呢個傳聞突然得嚟,都唔係空穴來風。阿仙奴今季有好多場波俾人見到後場用波比較差,打343時雙中場被緊逼看死,猜唔到個波上前場,對曼聯一役更加係因為試過後防轉邊失誤導致失波。近期韋舒亞同沙加拍檔打中場,情況雖然有改善,而哥斯尼同梅斯達菲波底都唔差,但綜合防守殺波能力同用波能力,加多個大衛雷斯的確有得諗,佢必要時甚至可以打埋防中位。不過大衛雷斯都30歲,呢層就唔似雲加作風。

另一方面,除咗阿仙奴報價收購大衛雷斯嘅傳聞之外,亦有指阿仙奴再次求購摩納哥嘅利馬。喺夏季轉會窗,《Sky Sports》曾經報導,雲加承認喺截止日報價9,200萬鎊,但被拒絕,有傳雲加喺冬季轉會窗再次求購呢位年輕法國中場。雲加最近向《Sky Sports》回應兩項有關傳聞:「我唔想談論任何特定嘅球員,不過呢啲傳聞都係假嘅。」另外,雲加又透露,暫時未有收到有關奧斯爾同山齊士嘅報價。


至於會唔會買人同幾時買,雲加照舊含糊其辭:「會,我哋會喺市場上睇下有咩嘢可以做。不過至於幾時,就好難講喇,因為呢樣嘢唔係淨係我哋可以決定。」依家只係1月2號,雲加擅長「語言藝術」,未報價唔等於冇興趣,阿迷已經習慣等到最後一分鐘。

Source: Sky SportsGoal.comESPN

留言


請按此登錄後留言。未成為會員? 立即註冊
  • OhMyGirl_Arin 於 02/01/2018 評論 NO. 1

    當車仔傻架咩 係賣都唔賣去同城阿仙奴啦

快捷鍵:←
快捷鍵:→