今季21場入16球 巴神想再踢歐聯:「我愛曼城,願意免費回歸」

睇足365 於 22/12/2017 發表 收藏文章
意大利前鋒巴洛迪利性格古怪,間中會做出令人不解嘅腦殘行為,例如喺自己屋企入面放煙花搞到火燭、著唔到「龜背」、「申請」紅牌出場……不過「巴神」其實已經生性咗唔少,喺法甲尼斯更加係頻頻有好表現,keep住的話,其實仲有機會踢返豪門。


「巴神」出道以來踢過唔少球隊,其中效力最耐嘅就係國際米蘭同埋曼城。佢當年都喺曼城留低唔少經典時刻,例如 "Why Always Me ?",原來佢都對於呢間效力過三季嘅球會念念不忘。


喺最近一個訪問中,「巴神」就表示:「我愛曼城,我愛曼城球迷同球會。我好樂意免費返返去。嗰陣係我生命中最好嘅時刻,雖然喺嗰度住有啲難適應。」

「喺足球嚟講,曼城係冇得頂嘅。我好高興,佢哋喺哥迪奧拿之下表現強勁,依家仲有20輪比賽,希望佢哋可以拎到冠軍。」

佢又話,自己同經理人討論過去向:「我打過俾經理人問佢『我喺一月會有咩做?』,佢話佢都唔知。我仲想留低,所以我哋會睇下到時點。」

「其實坦白講,我都想好似以前咁有一支好強嘅球隊喺我身後。我想踢歐聯,同埋贏到一啲獎盃。目標係返去踢一啲大球會,贏返一啲重要錦標。」
「我當然冇諗過咁快結束自己嘅職業生涯。我只係27歲,仲有六七年可以踢頂級比賽。」

雖然「巴神」應該唔啱哥迪奧拿用,但其實巴神喺尼斯嘅表現十分好,各項賽事上陣總共49場,射入33球,今季喺法甲13場入10球、歐霸5場入4球、各項賽事21場入16球。以呢個表現,其他有歐聯踢嘅球隊對佢有興趣都唔出奇。


Source: Daily Mail

留言


請按此登錄後留言。未成為會員? 立即註冊
  • 返身戰 於 22/12/2017 評論 NO. 1

    去曼聯

快捷鍵:←
快捷鍵:→