「奧瀟」窩利金球激似施丹，你話邊球靚啲？

奧斯爾曾經係「歐洲助攻王」，佢喺皇馬嘅時候專心助攻，比較少自己「搵食」。不過去到阿仙奴，雲加曾經講過，希望佢都可以做到自己入波。經過一段磨合之後，曾經有一排同山齊士互相配合，都入唔少好波，特別係佢一流嘅first touch，窩利真係啱晒佢。


今季「奧瀟」暫時喺英超15輪只係射入兩球，五個助攻以佢水平嚟講都略嫌太少。不過佢近排喺阿仙奴嘅表現，俾人感覺眼前一亮，唔再係昔日嘅「散步助攻王」，好耐冇試過見到佢連續咁多場波都步頭咁爽，現位走位、前場壓迫、回防樣樣做足，唔通真係搏轉會？

喺英超第18輪比賽，阿仙奴主場迎戰紐卡素，兩連和嘅阿仙奴今場開波就起勢狂攻，但始終把握唔到機會，只係靠奧斯爾嘅神來之筆僅勝一球。入波出現喺23分鐘，伊禾比右路地波傳中，山齊士勁射省中人，佢隨即盡全力衝前爭頂，個波最終落喺奧斯爾面前，佢凌空一抽，個波以完美弧線笠入龍門。
https://i.imgur.com/P797sa1.gif
https://i.imgur.com/IEoqJds.gif
呢一球令好多球迷諗起2002年歐聯決賽，施丹為皇馬射入一球相似嘅窩利金球，令皇馬以2-1擊敗利華古遜捧盃。

https://i.imgur.com/8OAaFtR.gif

睇返施丹嗰球，發現同「奧瀟」呢球，無論係位置、弧度、射法都非常相似。唔同嘅係，施丹嗰球個距離遠啲啲、個波高啲跌落嚟、歐聯決賽入球意義更大。不過講難度，「奧瀟」會唔會更難呢？因為個波喺冇咁高嘅高度跌落嚟，其實準備嘅時間更少，而且「奧瀟」要一邊褪後一邊射，如果唔係佢嘅一流球感，真係冇可能射到咁靚，但另一方面，施丹神就神在用非慣用腳射。大家話邊一球靚啲呢？

其實能夠同一代球王比較，已經係光榮啦！

Source: Telegraph、DailyMail