【名將之後】古華特之子為阿積士上演帽子戲法，阿爸都未試過！

球壇都有唔少名宿嘅仔仔踢波，但向來冇乜幾多個真係可以憑實力「踢出我天地」。荷蘭名將古華特 (Patrick Kluivert) 個仔祖斯甸古華特 (Justin Kluivert) 唔知有冇呢個機會呢？小弟就話，睇佢個勢應該大有作為。

今年18歲嘅祖斯甸古華特，跟隨爸爸嘅腳步，自細就喺阿積士青年軍踢波，直到上季喺1月第一次代表阿積士一隊喺聯賽上陣。Justin仔個樣同阿爸成個餅印咁款，踢嘅位置就唔同，阿仔主要係踼翼鋒嘅，佢喺上一季荷甲上陣14場，其中有7次係後備上陣，總共幫球隊攻入兩球。

Justin仔今季似乎更加接近主力位置，因為今季荷甲13輪比賽，佢已經有6次正選同3次後備上陣機會，當然仲要繼續努力爭取機會啦，不過相信好快會上位，因為佢喺啱啱嗰場荷甲比賽光芒四射，仲完成咗一樣阿爸都未試過嘅成就。
喺第13輪荷甲，阿積士主場對洛達，祖斯甸古華特正選上陣，今季仲未有入波嘅佢，「一係唔發威，一威就要龍咁威」，一口氣射入三球，仲幫球隊反勝。

喺45分鐘，阿積士本來落後0-1，祖斯甸古華特喺左路同隊友薛耶治配合，以速度推入禁區，右腳射遠柱入網，射成1-1，幫球隊扳平。

https://i.imgur.com/myllq4K.gifhttps://i.imgur.com/WLbzBFo.gif

去到60分鐘，佢個人表演，左路推大位遠射，龍門得個睇字。

https://i.imgur.com/AQXBF2y.gifhttps://i.imgur.com/UA3iedg.gif

85分鐘，法蘭基迪莊後場長傳直接俾到左翼嘅祖斯甸古華特，佢一兩下插花拐入大位，再次熨遠柱地波入網。加上,中間有多爾貝治同雲達碧克梅花間竹嘅入波，阿積士今場以5-1大勝洛達，另外法蘭基迪莊都十分搶鏡，佢今場貢獻咗3個助攻。

https://i.imgur.com/hq4tx78.gifhttps://i.imgur.com/adwdMpT.gif

Justin仔右腳打左翼，三球都係類似嘅招數，但對手早知係咁都係mark佢唔住，可見佢呢招已經相當純熟，而且佢射術的確精湛，唔知有冇接受過阿爸特訓呢？不過佢有一樣嘢就超越咗阿爸喇，阿爸雖然幫阿積士入過39球，兼且曾經係荷蘭國家隊歷史神射手，但就未試過喺荷甲上演帽子戲法，都算青出於藍啦，荷蘭未來靠你喇仔！



全場精華

https://youtu.be/8dllB27wJcI


順帶一提，古華特9歲嘅細仔Shane Kluivert，都可能係明日之星，因為佢人仔細細今年7月就已經俾Nike睇中，簽咗5年贊助合約，依家仲踢緊巴塞青年軍。


Source: ESPN、Sportbible