意足總主席終請辭 大簡:「足總所有人都應該辭職」

睇足365 於 21/11/2017 發表 收藏文章
意大利喺2018世界盃外圍賽附加賽不敵瑞典,黯然出局,同時保方等名將都宣佈退出國家隊,更加令今次失利添上遺憾。作為世界盃四屆冠軍,意大利落得今日嘅下場,領軍嘅主帥雲杜拿自然責無旁貸,但冰封三尺絕非一日之寒,背後嘅意大利足總又點會冇責任呢?最近,意大利名宿簡拿華路表示,認為意大利足總所有人都應該辭職,全面重建。


意大利名將簡拿華路 (Fabio Cannavaro) 係2006年意大利奪得世界盃嘅隊長,佢更加拎到嗰年嘅世界足球先生,係少有中堅能夠得到呢個殊榮,佢最近再次被任命為中超豪門廣州恆大嘅主帥。「大簡」近日接受咗《Sky Sport Italia》同《TMW Radio》嘅訪問,講咗一啲對於意大利足球嘅睇法。


佢喺足總炒咗雲杜拿之後表示:「呢個係積壓咗10年嘅問題,我哋需要推倒重來。」

「冇乜嘢需要解釋,亦冇乜話邊個要負責。我哋一定要由建立新嘅規則開始,可能係將意甲由20隊減到18隊,可能係規定預備隊只可以得意大利人……我哋可以討論3000個可能嘅選擇,但最重要都係去實行。」

簡拿華路受訪時,足總主席仲未正式請辭,但廣大傳媒都估計差唔多時候,大簡就認為:「我期望足總嘅所有人都要辭職。我知道我曾經同佢哋共事,不過係時候退落嚟喇。」

「我明白呢一場災難帶嚟嘅痛苦,不過依家講咩都冇用。每個人都應該退落嚟,因為大家都期望有一個強烈嘅信號,呢個係所有人嘅敗仗。」

「呢個唔係一場比賽,或者一個戰術嘅問題。我認為呢場敗仗已經潛伏咗10年,我哋需要推倒重來。」


去到噚日,所到極大壓力嘅足總主席Carlo Tavecchio終於辭職,佢喺早幾日仲死撐話自己唔會辭職,而且仲嘗試推卸責任,話雲杜拿唔係佢話要請嘅,又批評雲杜拿嘅戰術用人,試圖劃清界線。不過,足總起用一個撈咗幾十年但都毫無大賽經驗、毫無功績嘅老帥,又得到60年來第一次缺席世界盃決賽周嘅結果,身為主席嘅Tavecchio仲想置身事外,實在係太天真又太無恥,佢仲被爆涉及性騷擾醜聞,最終梗係要走人。

意大利嚟緊最大問題係主帥人選,其實世上好多名帥都係意大利人,依定隨口講都有例如安察洛堤、干地、艾歷尼、雲尼亞里等等,除咗雲尼亞里講過有興趣之外,個個寧願教球會都唔願意執呢個爛攤子,睇嚟都係正如大簡所講,呢個係累積多年嘅內部問題,由足總人事、聯賽結構等層面開始已經出問題,除非好似當年德國咁樣嚟個長遠改造計劃先有得搞喇。

Source: football-italia

留言


請按此登錄後留言。未成為會員? 立即註冊
    快捷鍵:←
    快捷鍵:→