【襄王無夢?】普捷天奴:梳爾喺修咸頓時態度有啲問題

睇足365 於 01/11/2017 發表 收藏文章
相信大家都睇過一單新聞,係話喺較早前,曼聯左閘梳爾(Luke Shaw)曾經公開表示,希望將來有機會再次同熱刺主帥普捷天奴合作。呢番說話曝光之後,唔少球迷同球評都認為,梳爾喺修咸頓跟住普帥嘅時候的確係最sharp,佢重傷之後更加喺曼聯得唔到機會,倒不如同熱刺嘅丹尼路斯交換啦!不過,原來呢個只係故事嘅上半部份,原來普帥曾經評價梳爾喺修咸頓時,態度限制咗佢嘅進步。


其實梳爾話希望跟返普帥嘅呢番言論,係喺《Sky Sports》著名體育記者Guillem Balagué嘅新書《Brave New World: Inside Pochettino's Spurs》入面嘅,作者Guillem Balagué圍繞住熱刺主帥普捷天奴進行咗一系列嘅訪談同專題研究,更加得到普捷天奴嘅授權可以喺上季跟出跟入。


當時梳爾就同作者講,「我覺得修咸頓喺佢(普捷天奴)麾下,得到本來係冇可能嘅成就。」
「我哋當時係聯賽入面其中一支最強嘅球隊。我希望有一日我可以再次為佢效力,而且我諗佢都的確希望有我為佢效力。」(ESPN

然後,前熱刺領隊舒活(Tim Sherwood)喺另一個訪問(唔關本書事)入面就話:「佢哋可能可以交換喎。普捷天奴鍾意用梳爾,摩連奴又想用丹尼路斯,交換咪搞掂囉。」(Squawka

有冇問過普捷天奴先?原來佢喺同一本書入面,已經評價過梳爾嘅表現,都唔係大家想像中咁好炸喎。

普帥喺書入面話:「我覺得佢當時(修咸頓時期)嘅頭腦冇用喺正確嘅地方上面,冇作出佢嗰個年紀應有嘅犧牲同決定。」(“I felt his head was not in the right place [at Southampton] to make the sacrifices and decisions that are necessary at that age,")

雖然「流出」嘅相關內容得咁少,但已經足夠見到,普帥對於梳爾嘅態度唔係咁滿意,認為如果佢可以更加勤力嘅話,應該可以做得更好。

梳爾啱啱打起嘅時候被視為英格蘭未來最強左閘,之後更加喺2014-15球季以高價加盟曼聯,可惜2015年9月就斷腳重傷,一沉不起。今季,梳爾只係為曼聯後備上陣,踼過兩場聯賽盃,合共47分鐘咁大把,上季亦都曾經俾主帥摩連奴公開批評。年少成名的確可能影響佢嘅心態,不過佢只係22歲仔,如果依家明白摩帥同普帥用心良苦批評佢,再勤力啲追返失去嘅時間都未遲!


Source: SquawkaMetroSports Illustrated

留言


請按此登錄後留言。未成為會員? 立即註冊
  • Tsang Jimmy 於 02/11/2017 評論 NO. 1

    待價而沽算啦

快捷鍵:←
快捷鍵:→