泰利開齋助維拉主場不敗　主帥布魯士：「希望佢今年26歲可以踢多10年」

相比起英超，香港球迷當然冇乜留意英冠，但英冠其實不嬲都氣氛好好，仲有唔少老牌強隊喺度打生打死，爭取升返上英超，淨係升上英超拎嗰筆轉播費已經係天價，難怪有人唔知講笑定真心講，英冠係世上最激烈嘅聯賽。今季英冠都有唔少熟悉嘅面孔，例如今日嘅主角——泰利，佢今季加盟阿士東維拉，啱啱場波仲開齋入波！


喺英冠第13輪賽事，兩間老牌球會碰頭，阿士東維拉主場迎戰富咸，維拉除咗主帥布魯士之外，仲有唔少熟悉嘅名字，例如泰利、格連韋倫、積甸拿克、史諾加斯，冇喺今場名單出現嘅艾邦拉荷、基亞利殊、積甸拿克、尼爾泰萊、米卡李察士等，以英冠標準吸講都算粒粒皆星。


比賽嘅23分鐘，維拉由侯利漢尼開出右路罰球，老將泰利攝到個靚位，一頂入網，係佢加盟維拉以來嘅第一球。睇返泰利嘅生涯數據，佢喺車路士上陣492場，入咗41球咁多，平均大約每12場入一球，作為中堅嚟講都算好勁，而佢今次第13場英冠上陣就入波，都仲keep到大約12場一球嘅紀錄！

https://youtu.be/t6nr8nzX49c
結果，維拉雖然一度被史提芬祖漢臣嘅靚罰球追平，但最後由艾度馬建功，以2-1取勝，保持今季主場聯賽五戰不敗紀錄，亦佔據聯賽第五位。賽後，布魯士就大讚泰利：「我哋個個都希望佢今年只係26歲，可以幫我哋踢多10年。佢嘅態度同領導能力係大家有目共睹嘅。」


36歲嘅泰利曾經係英格蘭國家隊兼車路士隊長，佢對車路士嘅忠心冇人可以質疑，到咗生涯尾聲去英冠嘅阿士東維拉尋求新挑戰，呢份精神都值得尊敬，而佢一加盟就理所當然成為維拉嘅隊長，唔知佢嘅經驗同領導能力，可唔可以幫助維拉重返英超呢？
Source: Daily Mail