日本球隊首次在亞冠淘汰賽踢走中國球隊 日媒:擊敗金元足球!中國球迷都冇眼睇

睇足365 於 19/10/2017 發表 收藏文章
噚晚大家半夜都掛住睇歐聯,香港應該唔係咁多人留意亞洲同級嘅賽事——亞冠,因為亞洲足球中,香港算係多啲人留意嘅係日職 J League 同澳職 A League ,而佢哋似乎重視本土聯賽多過亞冠,不過今場比賽就好有話題。(精華喺最底)


喺噚晚18:30嘅時間,亞冠進行咗四強次回合賽事,由中超嘅上海上港作客日職嘅浦和紅鑽,由上海上港喺首回合以1-1同紅鑽打成平手。大家都知日本波主場啲氣氛幾好,紅鑽喺主場一片紅海打氣之下,開波11分鐘,就靠角球攻勢,由柏木陽介助攻俾拿費爾達施華頭搥破門,攻入全場唯一入球。結果兩回合計,浦和紅鑽以總比數2-1淘汰上海上港,晉身2017亞冠決賽,對手係西亞代表、沙地阿拉伯冠軍希拉爾 (Al Hilal)。


今次最大嘅話題,就係近年大灑金錢嘅中超球隊廣州恆大,喺2013、2015奪得兩屆亞冠冠軍,但今屆喺八強就發生咗中超內訌,俾喺國內聯賽嘅競爭對手上海上港淘汰,而上海上港今次喺四強出局更加寫下歷史。因為今次係亞冠改制 (2009年) 之後,中國球隊第一次亞冠淘汰賽被日本球隊淘汰,搞到大陸班球迷好鬼嬲。


睇返大陸某大球迷社群網上嘅輿論,當然有一部份球迷係純粹出於民族情緒而覺得嬲,但原來大部份球迷都係覺得上港實在踢得太差。睇返上海上港嘅陣容,佢哋嘅主帥係教過車路士、熱刺、波圖嘅保亞斯,隊中有雄霸中超多年嘅巴西前鋒艾傑臣,同埋大家都好熟悉嘅奧斯卡同侯克。根據權威轉會市場統計網站《Transfermarkt》的估計,上海上港嘅陣容總市值大約係5,833萬歐元,而其實佢哋買奧斯卡同侯克都用咗超過1.1億歐元;相反紅鑽就只得2,368萬歐元,難怪連大陸球迷都大肆批評保亞斯同艾傑臣。


至於日本方面,一啲傳媒就認為係戰勝咗中國嘅金元足球,特別係佢哋嘅陣容總市值雖然都有23.68億歐元,但其實陣中只有3個外援 (拿費爾達施華、莫里斯奧卡維奴、隆比真歷),而今仗正選陣容中更只有拿費爾達施華一人。


日媒用咗當地潮語「爆買い」去形容上港,其實「爆買い」呢個詞語係當地用嚟形容中國遊客好似癲咗咁去日本掃貨,好誇張咁洗錢,用中文去望文生義一樣make sense,買到爆晒,今次套返落上港度,話佢哋亂咁洗錢買人,食字食得咁精彩,俾個like你啦!



首回合片段

https://youtu.be/9CA7_W1Xka4

次回合片段

https://youtu.be/bYvXAGgyRFw
Source: AFC、Goal.comsanspo.com

留言


請按此登錄後留言。未成為會員? 立即註冊
    快捷鍵:←
    快捷鍵:→