【Ching Sick Ball】終於有個做到嘢,文仙尼:「我會搵返巴神」

睇足365 於 16/05/2018 發表 收藏文章
意大利足協近日正式宣佈委任文仙尼為國家隊主帥,佢哋喺干地離任後搵嚟履歷不甚出眾嘅老帥雲杜拿執教,佢多個決定令人費解,最終意大利喺世界盃外圍賽出局,文仙尼雖然並非公認頂級名帥,但起碼屬於「正路」之選。


雲杜拿國家隊執教生涯最大敗筆,莫過於世界盃外圍賽生死戰,最後關頭急需入球之際,遲遲唔換入前鋒加強攻力,發生叫防中迪羅斯熱身被拒嘅一幕,最終佢換入咗前鋒比洛堤、翼鋒艾沙拉維及貝拿迪斯治,聯賽表現上佳嘅恩斯治尼並未獲派上場。恩斯治尼未必適合雲杜拿嘅國家隊打法係事實,亦未必適合作為尾段狂攻嘅棋子,但問題係唔啱用你又選,選咗又唔用,而其實意大利仲有值得入選嘅前鋒,呢個時候所有意大利球迷都掛住一個人,就係「巴神」巴洛迪利。


巴洛迪利自從2016-17球季加法甲尼斯以來,各項賽事上陣65場,已經射入43球。佢雖然年少成名,但原來從未試過喺一間球會入咁多波,此前最多係喺AC米蘭77場入33球,而家喺尼斯亦係生涯效率最高。另外,佢桀驁不馴嘅性格亦收斂不少,兩季以來只取得3面紅牌,當中更有啲係疑似被針對而拎,場內場外好少再惹事生非。


你可以話法甲水平參考價值有限,但佢今屆同樣喺歐霸寫下7場入6球嘅佳績,加上身體技術特點唔係太多現役當打意大利前鋒比得上,過去多次喺大賽發揮作用。咁樣嘅「巴神」,連做後備「看門口」嘅資格都冇,實在講唔通。

意大利近期所用嘅前鋒中,有邊一個比「巴神」更適合作為改變戰局嘅棋子?

曾經喺國米同曼城都執教過「巴神」嘅文仙尼,雖然曾經喺訓練中同佢激烈爭執,但接任國家隊主帥後,直言將會聯絡「巴神」:

「佢係一個意大利球員,我當然會同佢傾下,佢係其中一個我哋都想重新審視嘅球員。

我有可能會揀返佢,我哋想睇返佢2012歐國盃喺柏蘭迪利手下嘅表現。


所有表現好嘅人都有機會,我都會考慮球員嘅年齡,因為我哋希望為將來做準備,不過冇人會被排除在外。」


Source: ESPN
【世界盃 ng sick ball 街訪 — 第三集】

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→