雲爺爺都講金句：「嗰球入咗我會自殺、呢啲12碼一場可以吹10次」

近排英超領隊特別興講金句，以前雲加同費格遜鬥嘴嗰陣都講唔少，但近年又少咗。最近曼聯領隊摩連奴經常發表大膽言論，例如鬧自己球員幼稚、鬧賽程唔公平、鬧其他球隊有特權、鬧史高斯淨係識批評，哥迪奧拿試過話對手唔想比賽、快車賽期會殺死球員等，雲加最近都不甘示弱，喺對車路士賽後講金句。


周中呢場阿仙奴對車路士倫敦大吡，雙方打得好激烈，阿仙奴喺63分鐘由韋舒亞先開紀錄，但67分鐘就被罰12碼，俾夏薩特操刀射入。呢一球12碼有值得爭議嘅地方，因為比利連由下向上踢到夏薩特鞋底，睇返慢鏡個接觸都幾輕微，不過比利連的確完全踢唔到個波，late tackle踢中夏薩特，當然夏薩特嘅反應係大咗，球證可以唔俾12碼，但俾咗嘅話又合乎球例。

https://i.imgur.com/7Dn2122.gif
雲加睇住球隊幾經辛苦打破僵局，即刻又輸球12碼，好似上場對西布朗犯手球被12碼逼和咁，梗係嬲到彈起。「雲爺爺」上一場已經賽後因為鬧球證而面臨足總調查，今場賽後又向記者批評球證判決：「呢場係好精彩嘅比賽，我覺得雙方都有可能贏，遺憾嘅係我哋首先入波，但之後再一次遇到滑稽嘅12碼判決。」

「如果你問我嗰球係咪12碼，我會話係一個滑稽嘅判決。如果係咁，一場波可以吹10次呢啲12碼。」


另外，阿仙奴由比利連喺補時階段追平之後，差少少再失一球，當時莫拉達單刀射門俾施治擋出，後上嘅薩柏哥斯達第一時間勁抽中楣，嚇到阿仙奴球迷一抹冷汗。

https://i.imgur.com/tlam7WM.gif

當記者問到雲加喺比賽最後差啲再失一球嘅時候有咩感受嘅時候，雲加就笑笑口咁講：「我都唔知呀，如果入咗，我可能今晚返屋企就會自殺。」搞到現場記者都笑到gap gap聲。不過作為公眾人物，公開講自殺可能會引起爭議，雲加講嘢要小心啲喇。
Source: Goal、The Sun、Sky Sports