伊巴謙莫域不嬲都係「自信帝」，而且以佢嘅能力同球壇地位嚟講，佢的確寸得起，大家都對佢嘅「囂張」習以為常，最近佢又爆金句，再次自稱為神。
伊巴謙莫域之前膝頭重傷，依家已經好得七七八八，早排佢就返到曼聯訓練基地，而喺電視台做評述嘅阿仙奴名宿亨利就同佢一齊嚟到卡靈頓，採訪下佢。
其中一段小插曲，就係同樣曾經踢過巴塞嘅亨利，知道伊巴充滿自信，就諗住講笑咁激下佢，話見到牆上有好多曼聯球員同前球員嘅畫像，例如C朗、傑斯等，亨利就想話點解冇你個樣嘅？
事實上，亨利連完整嘅問題都未講到，伊巴已經作出完美回應。
伊巴好嚴肅咁話：「我知道你想問我咩啦。出年就會有架喇。」
「你知唔知道點解呀？因為佢哋仲未知道神個樣到底係點。」
聽到之後，亨利直頭笑到收唔到聲，仲要行出鏡頭之外避一避，就連伊巴自己都忍唔住笑，所以話伊巴真係好搞鬼。
其實伊巴都唔係第一次用「神回答」KO人，喺2013年，曾經有記者問佢覺得當日即將開波嘅瑞典對葡萄牙世界盃外圍賽附加賽，邊個會贏，佢就話「只有神先知道」，記者就話「咁我好難問佢喎。」，於是伊巴使出絕招：「你咪同緊佢講嘢囉！」
https://youtu.be/bH6VLUbRYT0
Source: Mirror、Skysports
請按此登錄後留言。未成為會員? 立即註冊