莫耶斯棄用硬留,祖赫特恐難征世盃

睇足365 於 31/01/2018 發表 收藏文章
一度長期穩佔英格蘭國家隊正選門將席位嘅祖赫特,自從因哥迪奧拿接任曼城主帥而失寵之後,簡直係諸事不順。喺國家隊方面,畢特蘭、碧福特等後起之秀得到嘅機會更多;喺球會方面,祖赫特被外借到韋斯咸都無法確保正選席位。


曼城主帥哥迪奧拿崇尚地面控球戰術,對手下門將都要求有一定腳下功夫,縱使一早簽下嘅前巴塞門將巴禾未能適應英超,佢都唔想再用祖赫特,結果真係俾佢喺今季搵到完全符合佢要求嘅艾達臣,祖赫特就被外借去韋斯咸。


祖赫特喺韋斯咸初時都係首選門將,但佢聯賽14戰就失咗30球,其中只有3場保持清白之身。一個門將嘅表現當然都會同球隊整體表現掛勾,特別係防線,不過球隊改用阿祖安把關之後,表現的確有改善,10戰失12球,幾乎少咗一半。

於是,祖赫特只有機會喺盃賽上陣,但唔好彩,隨住韋斯咸喺足總盃輸俾韋根出局之後,祖赫特只可以等待阿祖安受傷或者犯大錯被貶。早前有傳媒曾經報導,紐卡素有意喺一月向曼城借用祖赫特,如果成事嘅話,祖赫特就有機會再次向三獅軍團主帥修夫基證明自己,不過首先要韋斯咸同意終止借用合約先得。相信祖赫特一定好心急,因為佢今年已經30歲,如果錯過今屆世界盃,下屆34歲,要面對處於當打之齡嘅競爭對手,唔知仲有冇機會把守英軍大門。


韋斯咸主帥莫耶斯最近同傳媒講,話無意為咗2018世界盃而提早放走祖赫特:「我哋冇呢個打算。阿祖安需要每一場都展現最佳狀態,我哋隊中有激烈嘅良性競爭,有一個英格蘭國門喺度可以鞭策阿祖安。某程度上,我對於呢個情況好滿意,因為我需要門將有好好嘅表現去確保勝利同埋遠離降班區。」

「只要有任何機會,我覺得時機合適,都會俾祖赫特上陣。我會俾機會佢,不過我要尊重阿祖安,因為佢而家嘅正選位都係用表現爭取返嚟。一有機會,我就會俾祖赫特證明自己仍然係英格蘭最佳門將。我會試下,只要阿祖安表現下滑,就會叫祖赫特準備好。」


Source: Daily MailStandard
標籤: 祖赫特  韋斯咸  阿祖安  莫耶斯  

留言


請按此登錄後留言。未成為會員? 立即註冊
    快捷鍵:←
    快捷鍵:→