英超決議18/19球季不會正式使用VAR 哥迪奧拿:「曼聯、車路士有份否決」

睇足365 於 14/04/2018 發表 收藏文章
英超賽會近日開會後宣佈,2018-19 球季英超將不會正式以 VAR (Video Assistant Referee) 視像助理球證協助執法,留待更進一步測試,曼城主帥哥迪奧拿表示曼城支持使用VAR,認為係曼聯、車路士等球會否決有關提案。


英國時間4月13日,英超賽會召開會議,由全部20支球隊代表,表決2018-19球季英超是否使用VAR,但未能通過。賽會發表聲明,指20支球隊協議於2018-19球季將會繼續VAR進行進一步測試,即不會正式使用VAR輔作執法,而係繼續喺其他本土賽事,如盃賽上試行。


曼城主帥哥迪奧拿及後接受《Sky Sports》訪問,透露曼城支持於來季英超啟用VAR,但有其他大球會否決議案:

「我認為曼城支持議案,但有其他大球會,例如曼聯、車路士,佢哋唔希望使用VAR。

咁都冇問題嘅,不過呢件事最終都會發生。唔止喺英格蘭,喺全世界嚟講,球證都應該得到幫助。今時今日嘅足球變得越嚟越快。

好似而家咁,我哋都唔知最近嗰場波,皇馬應唔應該得到12碼。呢啲決定對球證嚟講係好困難,我認為佢哋應該得到幫助。


我諗遲早都會推行,我對於佢有冇效暫時冇意見,可能開始時效果唔好,咁唔緊要,下一次會有進步。只要開始去用佢,就會變得更加好、更加快、更加有效率。」


現時,歐洲越嚟越多比賽採用VAR,例如德甲、2018世界盃決賽周,都會採用VAR。喺英格蘭方面,暫時只有足總盃及聯賽盃試驗VAR。


Source: Sky Sports

留言


請按此登錄後留言。未成為會員? 立即註冊
    快捷鍵:←
    快捷鍵:→