【瑞英大戰】伊巴邀碧咸打賭「宜家傢俬放題」，輸咗要喺溫布萊著英格蘭波衫

講起瑞典，香港人會諗起瑞典傢俬集團 IKEA ，球迷就會諗起瑞典前鋒伊巴謙莫域。36歲嘅伊巴謙莫域現時喺美職聯效力洛杉磯銀河，而洛杉磯銀河亦係前英格蘭球星碧咸嘅前球會，兩人亦係前PSG隊友。兩位洛杉磯風頭躉，因為即將舉行嘅世界盃八強，瑞典對英格蘭而公開打賭，花生友一定唔可以錯過。


伊巴謙莫域早前喺社交網上開post，tag埋「咸爺」話：「Yo，碧咸，如果英格蘭贏波，我請你食乜都得，如果瑞典贏波，我喺 IKEA 買咩都入你數 ok?」


之後，洛杉磯銀河 twitter 就做中間人，cap 咗碧咸嘅回應出嚟，碧咸話：「如果瑞典贏波，我就去 IKEA 幫你喺洛杉磯間新屋買嘢，如果英格蘭贏波，我要你嚟溫布萊球場著住英格蘭波衫睇一場英格蘭嘅比賽，半場要食炸魚薯條。」



然後，伊巴話 「Lets Go」 。


識玩嘅「關公」當然唔會錯過啦，IKEA 就話如果伊巴帶碧咸過嚟就請食肉丸喎。（會唔會伊巴其實賣緊廣告？）


今次有好戲睇喇，想知邊個要找數？就要留意今晚22:00嘅瑞典對英格蘭！