【球球救國】未有機會表演的「巴塞神塔」,世盃三場怒轟三個頭槌入波

睇足365 於 04/07/2018 發表 收藏文章
冇錯,今年一月加盟巴塞隆拿嘅耶利文拿(Yerry Mina)不久前仍然被懷疑會唔會係「水貨」,甚至早前已經有關於佢嘅離隊傳聞,喺碧基同烏姆迪迪拍檔出任中堅之下,耶利文拿得到嘅機會唔多,所以「巴塞神塔」係講笑,但「哥倫比亞神塔」佢當之無愧,邊個可以保證佢冇可能將呢個表現帶返球會?(短期內唔俾人賣走的話)


耶利文拿未滿24歲(今年9月生日),本身踢巴西甲組聯賽球隊彭美拉斯,今年一月加盟巴塞隆拿,據報轉會費為1,180萬歐元,亦被巴塞定下1億違約金。1.95米嘅身高驟眼令人估計佢同巴塞地面傳控風格不合,加上巴甲出身,對部分球迷嚟講可以話係名不經傳,涉及逾千萬轉會費,不禁令人懷疑巴塞係咪再一次做「水魚」。


應該唔多人睇過佢喺巴甲嘅表現,而就算佢喺巴甲有神一般嘅演出,都會被質疑參考價值不足,去到巴塞半季又只得5次聯賽上陣紀錄,但能夠喺四年一度世界盃有驚人演出,絕非易事。耶利文拿今屆決賽周代表哥倫比亞上陣3場,剛好錄得3個入球,而且全部係以頭槌攻入,當中更不乏「救國波」,最近一次就係剛剛16強對英格蘭,喺93分鐘補時階段頂入扳平一球!


耶利文拿今屆決賽周首次上陣係喺分組賽第二輪對波蘭,40分鐘用頭槌打破僵局,攻入全場第一個入球,最終助球隊以3-0贏波。


分組賽第三輪對塞內加爾,耶利文拿74分鐘嘅入波,直接令本來有機會出局嘅哥倫比亞晉身16強。


哥倫比亞今屆防線有頗多防線「甩轆」場面,但主角通常係耶利文拿嘅拍檔卡路士山齊士同戴雲遜山齊士,耶利文拿嘅防守能力仍然有待觀察,但以佢嘅高大身型,腳下功夫同移動,算係出人意料地靈巧,但略嫌有時愛賣弄腳法,希望佢返到巴塞有更多機會證明自己。當然,幾場波有表現唔代表佢一定可以keep住落去,而且就算再勁,都可以唔啱巴塞用。不過就好似墨西哥門神奧祖亞咁,喺世界盃場場神救但聯賽無甚表現,一樣係國家英雄,夠威一世!
【世界盃 ng sick ball 街訪 — 第三集】

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→