烏里治獨坐球場反省 謝拉特深表同情:「我都試過喺關鍵時刻跣腳」

睇足365 於 02/05/2018 發表 收藏文章
歐聯四強次回合,拜仁慕尼黑作客以2-2、總比數3-4不敵皇家馬德里,無緣晉身決賽。拜仁今仗率先憑甘美治入球追平總比數2-2,及後賓施馬頭槌建功,加上呢位法國前鋒喺46分鐘把握拜仁失誤再下一城,令拜仁雖然有占士洛迪古斯倒戈入波,仍以一球之差出局。犯下大錯嘅門將烏里治,自然成為眾矢之的。


比賽46分鐘,拜仁中場杜利素回傳,門將烏里治出迎未能解圍,被賓施馬輕鬆射入。睇返慢鏡,烏里治嘅動作有啲詭異,佢出迎本來可以快一步接觸個波,但懷疑佢喺落地一刻突然諗起唔可以用手接回傳,所以縮手,但已經趕唔切用腳解圍。

https://i.imgur.com/WQdZ5vX.gif
https://i.imgur.com/XeN2taq.gif

有球迷就認為佢就算落咗地先諗起唔可以用手,都好應該照去,寧願輸間接自由球,好過咁樣送個空門俾人射。不過當時千鈞一髮,一瞬間嘅判斷力正正係影響一個門將頂級與否嘅因素。 杜利素回傳當然好大責任,但做門將就係咁唔公平,穩健嘅時候好少有人提起,一個失誤就俾人記一世,若烏里治當刻判斷準確,一開始就決定用腳清波,或者如球迷所講,就算用手都照去,後果可能已經唔一樣。

現場評述呢場波嘅利物浦名宿謝拉特,就認為烏里治係跣腳,仲話自己都試過,表示同情咁話:

「我都試過喺關鍵時刻跣腳,以呢個方式輸波係好殘酷。」


謝拉特講緊嘅係自己喺2013-14球季第36輪,對車路士一仗中跣腳,被丹巴巴亞單刀射入,導致利物浦以2分之差失落冠軍。犯錯的確冇人想,睇到烏里治嘅反應都幾心酸。


烏里治被影到喺比賽結束之後,一個人呆坐場上,事後更被要求進行禁藥檢查。痛定思痛,繼續努力啦!

Source: Daily Mail

留言


請按此登錄後留言。未成為會員? 立即註冊
    快捷鍵:←
    快捷鍵:→