法媒透露發火原因 馬賽罰艾夫拿無限期停賽,名宿:「球迷冇可能再俾佢落場」

睇足365 於 04/11/2017 發表 收藏文章
早前同大家報導過馬賽後衛艾夫拿 (Patrice Evra) ,喺歐霸盃比賽熱身時間中,同場邊嘅己隊球迷發生衝突,更使出「功夫腳」,歐霸盃第一個於賽前領到紅牌嘅球員。(《學簡東拿?艾夫拿熱身時間怒踢球迷,歐霸史上首人賽前領紅》) 當時仲未有人知道點解呢位前法國隊隊長咁激氣,依家外國有不少傳媒跟進緊呢件事,指出應該同球迷當時唱嘅歌仔有關。


法國傳媒《隊報》就話,喺呢場比賽之前,跟隨球隊作客去到葡萄牙嘅一班死忠球迷,對於艾夫拿近期嘅表現唔係咁滿意,於是唱歌批評佢。大家去過現場睇波都知,球迷唱歌仔係咩一回事,就好似嗌口號或者大學dem beat咁,估唔到今次佢哋唱嘅歌竟然係用嚟鬧艾夫拿。《隊報》透露,球迷向熱緊身嘅艾夫拿唱出「滾出馬賽」同「返去拍片啦」之類嘅歌仔,好似話不滿艾夫拿表現唔好之餘,仲掛住玩Instagram拍片喎。

loading

艾夫拿聽到之後就好嬲,拎個波踼向看台上嗰班球迷,班球迷自然又好嬲,衝落去場邊同艾夫拿鬧交,而艾夫拿更加喺推撞中首先出拳,隊友同職員拉開雙方,但佢仲使出「功夫腳」踢人個頭。

loading


https://streamable.com/ryndk

事後,歐洲足協就未公佈會罰佢停賽幾耐,但馬賽會方就率先要佢喺完成紀律調查之前,無限期停止一切足球活動,包括隊內訓練同比賽。雖然馬賽會方嘅聲明都表示,唔排除會控告挑釁艾夫拿嘅球迷,但跟據一位名宿嘅經驗,今次行衰運嘅,九成九係艾夫拿。

現職評述員嘅前馬賽前鋒加斯卡連奴 (Tony Cascarino),曾經為馬賽上陣84場射入61球,喺球隊有一定地位,佢日前就話,艾夫拿向球迷出手係大錯特錯,因為馬賽同當地球迷嘅關係非比尋常,得罪咗佢哋就唔使旨意再喺度踼波:

「我唔知道佢哋講咗啲咩令艾夫拿要起腳踢自己球隊嘅球迷,但如果佢仲可以著起馬賽波衫,我會好驚訝。」

「呢間係好獨特嘅球會,我喺度嘅兩年時間話我知,球迷對球會好有影響力。無論受到乜嘢挑釁,只要攻擊佢哋,艾夫拿就唔可以再返嚟。」

「呢啲人當中,有好多人係冇乜錢,但仍然跟住馬賽作客周圍去,球會對佢哋嚟講就係一切。」

「如果話呢隊球隊好特別,咁馬賽呢個城市都係一樣。佢就好似一個小國度咁,入面嘅人覺得『我哋』一齊對抗緊『其他人』,喺足球或者生活上都係咁樣。喺呢個環境之下,攻擊一個馬賽支持者,係艾夫拿最唔應該做嘅事。」

loading

睇嚟,艾夫拿有可能面臨被球會提早解約嘅下場,估唔到36歲先落得失業嘅下場。

Source: Daily Mail SportsbibleESPN

留言


請按此登錄後留言。未成為會員? 立即註冊
    快捷鍵:←
    快捷鍵:→