柏度話車路士球員100米賽跑最快嘅係……三次之內你都未必估得中！

車路士隊中都有唔少跑得快、腳法又好嘅球星，好似柏度咁，佢自己就跑得幾快，不過車路士陣中跑得最快嘅究竟係邊個？你問車路士每個球員都可能有唔同答案，唔同距離、有冇帶波又唔同講法。如果你問柏度的話，個答案都算出人意表。


最近，柏度就接受咗《Sky Sports》節目《Soccer AM》嘅訪問，雖然節目未正式出街，但《Soccer AM》已經透露咗部份內容，其中包括柏度大爆自己對車路士隊友嘅印象，例如邊個最勁、邊個最快、邊個最大隻……

對於邊個跑得最快，柏度講嘅答案就唔係咁易估得中，好多人第一時間會諗夏薩特、韋利安、摩西斯呢啲，但佢就咁講：

「好難講喎，球隊入面有太多跑得快嘅球員，有梅桑達、韋利安、薩柏哥斯達。」

「唔知呢，簡迪都成日跑嚟跑去，冇時停。」
「呢四個人應該係最快架喇。」

「跑100米邊個會贏？咁應該係薩柏哥斯達喇。」


唔係話薩柏哥斯達慢呀，不過喺印象中，要數車路士跑得最快嘅球員，睇怕頭幾個都未必數到佢。雖然唔係話好有參考價值，但不妨睇下打機又如何？睇返FIFA18數據，淨係睇 "Sprint speed" 呢項數據嘅話，車路士最快應該係夏薩特，有87咁高，而韋利安同梅桑達都有86，薩柏哥斯達就85，都高過摩西斯嘅83。

Source: Sky Sports、football.london、chelsea-news、sofifa.com