普巴被揭操練甩底,要紅魔派職員上門叫起身

睇足365 於 25/12/2017 發表 收藏文章
一眾打工仔都好明白,天氣凍起上嚟,真係會唔願起身,估唔到呢樣嘢同樣發生喺曼聯球星普巴身上,曼聯同領隊摩連奴一向都重視紀律,普巴都夠膽瞓到唔去操練,真係「沙膽」,聽講隊中一啲前輩仲因為咁而不滿添。


根據《Daily Mail》爆料,以8,900萬英鎊打破曼聯轉會費紀錄嘅24歲中場普巴夠晒大牌,佢喺當地時間12月3號早上,原本要出席球隊嘅賽後操練,曼聯喺前一日就以3-1撃敗阿仙奴,普巴喺比賽中因侵犯比爾連而領紅。唔知道普巴係慶祝贏波玩太夜,定係純粹唔知醒起身,總之就冇出席到操練。


操練開始之後,曼聯見普巴甩底,於是打電話睇下佢喺邊,點知打極都冇人聽。好明顯佢係未起身啦,曼聯唯有派出職員專登揸車由卡靈頓訓練基地,去到10公里外嘅Hale Barns,上門摷普巴起身。

《Daily Mail》又表示,隊中一啲前輩,例如係伊巴謙莫域、隊長卡域克同艾殊利揚格等,對於有隊友,同埋一啲青年軍球員,有咁嘅表現,都感到不滿。咁啱得咁橋,普巴喺12月21號場聯賽盃,停賽期滿復出,球隊就爆冷以1-2不敵英冠嘅布里斯托城,賽後摩連奴不點名狠批一啲球員嘅態度:「我哋有啲球員以為自己返緊寫字樓工,有啲人仲唔想返工添。」摩佬講緊邊個就自己估啦!


Source: Daily Mail

留言


請按此登錄後留言。未成為會員? 立即註冊
    快捷鍵:←
    快捷鍵:→