【情有獨鍾】前曼城水貨兩球助哥連泰斯奪冠,大哨興奮到彈彈下

睇足365 於 17/11/2017 發表 收藏文章
「外星人」朗拿度一生踼過好多大球會,喺西甲踼過巴塞隆拿、皇家馬德里,喺意甲踼過國際米蘭同AC米蘭,不過喺職業生涯踢過嘅7支球隊入面,令佢情有獨鍾嘅係最後一站嘅哥連泰斯,因為佢近年一直同呢隊波關係密切,不時親身撐場,最近更真情流露,為球隊開心到彈起。身為球迷嘅,好耐冇見到激情四射嘅「大哨」,我都開心埋一份呀。


朗拿度當年離開皇馬之後,去到AC米蘭飽受傷患困擾,年紀已經唔輕嘅佢一季後就返到巴甲,加盟哥連泰斯,兩季之間為球隊射入18球,呢隊波亦成為佢生涯嘅最後一站,佢喺2011年宣佈掛靴。論效力時間長短,大哨喺國米同皇馬分別踢咗5年,而喺皇馬更上陣127次,係佢上陣次數最多嘅球會;論初心,好多球員都對於自己出道嘅球會有深厚嘅感情,大哨生涯第一支職業球隊就係巴甲嘅高士路。不過,佢最鍾意嘅球會似乎係哥連泰斯。


哥連泰斯喺香港時間11月16號07:45上演嘅巴甲第35輪比賽中,主場面對富明尼斯。喺2014世界盃,巴西國家隊鋒線孖寶費特 (Fred) 同曾經踼過愛華頓、曼城同江蘇蘇寧嘅祖奧 (Jô) 睇到人「媽媽聲」,令人感嘆巴西無大將。呢場波,哥連泰斯正正係由祖奧梅開二度,加上謝臣 (Jádson) 埋齋,以3-1擊敗富明尼斯,剩低3場比賽領先次席甘美奧10分,提早奪得巴甲冠軍。

loading


又喺現場睇波嘅大哨,睇住愛隊拎到隊史第7個聯賽錦標,即刻興奮到彈彈下,好耐冇見過佢咁激動。佢之後又喺Instagram瘋狂po相,你就知佢有幾鍾意呢隊波啦。順帶一提,之前有報導指,哥連泰斯嘅前會長山齊士 (Andrés Sanchez) 公開表示,自己如果成功當選球隊下一任會長,一定會請大哨返嚟球會做嘢,可能係總監之類嘅職位。

https://streamable.com/h5z4f

loading


哥連泰斯球迷喺球隊提早奪冠之後好激動,放晒煙花咁,可能球迷嘅激情都係大哨鍾意呢隊波嘅原因之一。


Source: Daily MailESPNSportbible

留言


請按此登錄後留言。未成為會員? 立即註冊
  • Paul Sun 於 17/11/2017 評論 NO. 1

    祖奧+廢物 哩個巴西前線組合真經典

快捷鍵:←
快捷鍵:→