【封神之路】意記者談山神早年經歷:每日加操兩個鐘,有次漏咗車匙直接越野跑返屋企

睇足365 於 14/02/2018 發表 收藏文章
智利球星阿歷斯山齊士喺一月轉會窗加盟曼聯,佢喺阿仙奴時被稱為「山神」,除咗球技之外,佢不惜氣力嘅打法同堅毅嘅性格都值得欣賞。「山神」身高1米69,喺職業球員前鋒中比較輸蝕,但因為佢努力鍛煉身體,令自己對抗性同爆發力兼備,加上球技,先可以將「矮腳虎」嘅身型發揮到極致。究竟佢係點樣變成而家咁嘅呢?


根據曼聯官網一篇報導,意大利記者 Pietro Oleotto 曾經喺山齊士加盟意甲球會烏甸尼斯之初,貼身追訪佢一段時間,佢最近透露,山齊士係點樣逐步變成今日呢個「體能怪獸」。


「喺第一個球季嘅時候,山齊士係好瘦嘅,而且經常都只係留喺右翼。禁區嘅身體碰撞對佢嚟講太難應付,不過球隊好需要佢多啲走入中路,更靠近龍門,活用佢嘅盤球能力。」

「於是佢開始鍛煉身體,球隊專誠為佢搭建一個臨時嘅專用健身室。佢每日操練之後,都會加練兩個鐘。我記得喺嗰次季前訓練營嘅中途見到佢,俾佢突然操到變筋肉人嚇親。」


呢位記者仲分享咗一件好深刻嘅事:

「有一次喺訓練之後,佢揸車去咗烏甸尼市中心買嘢,不過佢唔小心鎖咗條車匙同電話喺架車入面。

我唔知一般人遇到呢個情況會點做,不過佢選擇直接跑步返屋企。佢由市中心一路跑返去8公里外,喺啲山入面嘅屋企。有居民見到佢著住烏甸尼斯訓練衫跑過,所以打電話俾啲報紙報料。將呢個情況變為一次即興嘅越野跑,呢樣嘢夠晒『山齊士』。」


所以話,山齊士一直都係憑住驚人嘅意志同決心,把握每個鍛煉嘅機會,提升自己,先可以成為今日嘅「山神」,呢份態度絕對係冇得頂。正如佢離開阿仙奴之後,有球迷話佢係叛徒或者質疑佢有冇hea踢,雲加都講返句公道說話,話山齊士從來冇一刻唔係為球隊盡力,佢嘅專業態度係無可挑剔。

Source: ManUtd.com

留言

會員
我要評論
請按此登錄後留言。未成為會員? 立即註冊
  • anyman2106
    anyman2106 於 15/02/2018 評論 NO. 1

    要好似山神咁努力好難😂😂

  • 閒雲野鶴
    閒雲野鶴 於 15/02/2018 評論 NO. 2

    雖然佢宜家發過豬頭, 不過以佢嘅特質, 當打之年離開咗巴塞都應該算得上係佢一個幾重大嘅遺憾。

快捷鍵:←
快捷鍵:→