【大難不死】撼卡希爾裂頭骨留恐怖疤痕,前熱刺中場險死仍不願放棄足球

睇足365 於 02/01/2018 發表 收藏文章
之前曾經同大家分享過一單關於前熱刺中場賴恩美臣 (Ryan Mason) 恐怕面臨退役嘅消息,原來轉眼間又過咗半年,但佢仍然未放棄,意外過去一年,最近再有關於佢嘅新消息。


呢個不幸嘅事件係發生喺2017年1月22日嘅英超比賽,當時賴恩美臣為侯城上陣作客車路士,喺一次同車路士中堅加利卡希爾爭頂高波時,意外撞傷頭部,即時陷入昏迷,要送院治理。


賴恩美臣因為頭部骨裂,一度情況危急,需要馬上進行手術。佢經過大約半年休養之後,喺夏天可以再次進行基本訓練。喺2017年8月,時任侯城領隊史拉斯基 (Leonid Slutsky) 向《BBC》透露,賴恩美臣接受過兩三位專家醫生嘅評估,未能夠就佢適唔適合再次征戰職業足球達成共識,希望佢自己可以好好考慮,因為即使佢嘅頭骨完全癒合,都會比常人脆弱,如果再次喺激烈嘅職業比賽中撞到頭部,面對嘅可能係死亡。

踏入2018年,距離事發大約一年,美臣就喺Instagram展示佢手術後留下嘅疤痕,長長嘅疤痕橫跨頭部嘅大半,顯示佢當時嘅情況係幾咁兇險,不過主角應該係佢喺上月底出世嘅囝囝,行過鬼門關之後得到新生命,世事有時就係咁奇妙。美臣就話:「今年我遇到嘅事好難用言語形容。我好自豪捱過咗呢個身體同心理上嘅難關,仲可以喺一年嘅最尾抱住自己個仔,感覺好特別。我會變得更強。」

loading


美臣似乎仍然想返出嚟踢波,佢喺較早前接受過《Sky Sports》訪問,就話將會休息多一段時間然後希望可以復出:「我嘅身體已經完全冇事。不過我嘅頭骨仲需要多少少時間癒合,暫時仲未完全合返埋一齊。不過當嗰一日來臨嘅時候,希望我可以有足夠嘅體能狀態返返嚟。我依家只可以等。球會同主席都好好,好有耐性。佢哋全力支持我,相信頭骨完全生返埋之後就冇任何問題。」

26歲賴恩美臣係熱刺青訓出身,2016-17球季以超過$1000萬鎊轉會費加盟當時仲喺英超嘅侯城,打破咗侯城的轉會費紀錄,可惜正值佢得到重用嘅時候,就遇上今次意外,但生命高於足球,希望佢早日康復。

Source: Daily Mail

留言


請按此登錄後留言。未成為會員? 立即註冊
  • Fan Lau 於 04/01/2018 評論 NO. 1

    加油

快捷鍵:←
快捷鍵:→