【回頭是岸】列斯聯轉Logo被球迷恥笑,勁似小學雞功課同遊戲封面

睇足365 於 25/01/2018 發表 收藏文章
有時一樣嘢對耐咗總會有感情,而一啲經典更加係不可超越,可惜總係有人覺得要搞啲新意思,簡直係「冇啦啦搵撻瘌」。


列斯聯雖然已經離開英格蘭頂級聯賽好多年,不過都曾經係強極一時,拎過幾次頂級聯賽冠軍,又入過歐聯決賽,到而家仲有好多球迷關注佢哋,一般球迷見到佢哋個Logo自然會認得呢隊係列斯聯。好衰唔衰,唔知邊個咁得閒,覺得係時候搞搞新意思,整咗個新嘅Logo出嚟。

現時喺英冠爭取升班嘅列斯聯,最近就官方宣佈,為2019年球會成立100周年設計咗個新標誌,仲話經過6個月嘅研究同埋諮詢過10,000人先得出呢個新設計。

loading

呢個消息出嚟之後,網上反應極大,普遍都認為個新設計實在太醜樣,最重要嘅係失去咗列斯聯嘅傳統特色,霸氣盡失,仲要連舊標誌中間朵花都唔見埋。

網民就覺得個新設計就係冇設計,字體、圖案統統唔合格,好似小學生交功課咁,又有人話好似足球電子遊戲《Pro Evolution Soccer 2》個封面,更加已經有幾萬人聯署反對用呢個新Logo。

loading

列斯聯官方就解釋,呢個設計,係象徵與球迷嘅緊密連繫係球會最珍視嘅嘢,所以新設計入面有一個人將拳頭放喺胸前。好彩佢哋都識得回頭是岸嘅道理,見到球迷對新設計有咁大反應,都肯承諾再次展開諮詢,希望佢哋用返舊個Logo 啦。


喺英冠第28周之後,列斯聯暫時以43分排喺第10位,距離第6位升班附加賽席位有3分差距。

Source: BBCSky Sports
標籤: 列斯聯  英冠  

留言


請按此登錄後留言。未成為會員? 立即註冊
  • kjhunter 於 26/01/2018 評論 NO. 1

    真係要回頭是岸, 舊logo其實幾靚

快捷鍵:←
快捷鍵:→