唔想做老seafood!紐尼沙軒29歲之齡宣佈退出國家隊 文字

睇足365於 04/11/2017 發表 收藏文章
有留意紐尼沙軒 (Nuri Sahin) 嘅球迷,應該會為佢感到可惜,呢位曾經係萬眾期待嘅天才新星,最終仍然冇辦法達到眾人嘅期望,曾經踼過皇馬,又曾經重傷,近年返到多蒙特仍然有唔錯嘅表現,都算係一點安慰,不過佢就突然選擇喺呢個時候宣佈退出國家隊,令人驚訝。


29歲嘅紐尼沙軒年少成名,2005年以16歲又334日成為德甲史上最年輕嘅上陣球員,亦係德甲史上最年輕嘅入球球員,兩項紀錄保持至今,佢更加喺17歲就入選成為土耳其大國腳,地標戰友賽德國更加後備上陣射入奠勝一球,風頭一時無兩。


去到2011年,沙軒加盟皇馬。個人認為呢個可能係沙軒生涯中最錯嘅決定,當然以佢當時嘅年紀嚟講,皇馬想買自己喎,梗係去啦,所有足球員嘅夢想都係踢皇馬、巴塞呢啲球隊,但當時嘅皇馬根本好少俾機會年輕球員,雖然雙方簽咗6年合約,但佢去到有「球星墳墓」之稱嘅皇馬,只係得4次出場紀錄。之後又被外借去利物浦,最後返到多蒙特,佢先終於搵返自己。


喺土耳其國家隊,因為沙軒曾經重傷長達一年,佢由2016歐國盃開始已經唔再係必然正選,亦都因為受傷同狀態不穩而間中落選,不過佢喺早前完成嘅2018世界盃外圍賽中都有上陣,可惜未能幫助土耳其擠身決賽周,即係話如果要挑戰再下屆2022世界盃,佢到時已經大約34歲,2020歐國盃嗰陣都32歲。既然係咁,沙軒覺得不如讓位啦,如果國家依家開始俾一啲年輕人上位,到時可能已經做到主力。


所以喺最近國家隊征召嚟緊嘅友賽名單時,沙軒發表聲明,宣佈退出國家隊。佢話:

「我喺咁多個年齡組別中,合共著起過土耳其嘅波衫接近100次,而我著住呢件波衫行嘅每一步都令我感到自豪。」

「我選擇喺呢個時候退出國家隊,係因為我想俾多啲機會年輕球員。我相信只要我哋有一個好嘅計劃去支持佢哋,土耳其嘅新一代可以喺未來嘅10至15年帶領我哋取得成功。」

「喺我嘅生涯中,我得到過好多機會同埋保貴嘅經驗。我會繼續同土耳其足球保持接觸,並且隨時準備提供協助。」




沙軒至今仍然係土耳其最年輕嘅上陣兼入球球員,佢為大國腳上陣51場,30次正選上陣,射入2球。喺多蒙特方面,沙軒今季暫時喺聯賽8次正選上陣,交出2入球1助攻,表現非常可人。

Source: ESPNSportBible

留言

會員
我要評論
請按此登錄後留言。未成為會員? 立即註冊
  • Weng Ip Choi
    Weng Ip Choi 於 04/11/2017 評論 NO. 1

    佢呢種決定係啱,既然入唔世界杯,不如索性退出國家隊

  • Man Ho Mak
    Man Ho Mak 於 04/11/2017 評論 NO. 2

    佢容易受傷,踢埋國家隊咁多比賽,佢未必頂得住,所以呢個決定都好啱嘅

  • Kenny Tam
    Kenny Tam 於 04/11/2017 評論 NO. 3

    歐聯?

  • 岸西
    岸西 於 04/11/2017 評論 NO. 4

    上圖個樣有啲似根度簡

  • Bryan Ha
    Bryan Ha 於 04/11/2017 評論 NO. 5

    相反有個39歲都未係好想退休

  • Yat Ming Wong
    Yat Ming Wong 於 04/11/2017 評論 NO. 6

    Eric Choi

快捷鍵:←
快捷鍵:→