史高拉利爆C朗不斷問中超生活:「我同佢講有機會一定要去」究竟點解?

睇足365 於 21/03/2018 發表 收藏文章
皇馬球星C朗拿度年屆33歲,今季初段喺西甲表現有嚴重下滑跡象,再次令人思考佢喺不久將來離開皇馬嘅事,佢喺2018年開始全面回勇,包括上周末上演大四喜。不過踏入職業生涯後期,喺皇馬效力九年贏盡一切,會唔會促使C朗離隊尋求其他發展?


自從廣州恆大掘起,中國超級聯賽以天價邀請任何世界級球星已經唔係天荒夜談,今年就有馬斯查蘭奴、卡拉斯高等前西甲球星加盟,雖然C朗貴為球王級人馬,但到咗呢個年紀,會考慮中超其實絕對唔荒謬,當年「足球沙漠」美國嘅紐約宇宙隊都曾經得到球王比利、碧根鮑華、告魯夫等人效力,邊個敢話冇可能,而且我哋可能忽略咗C朗身上嘅一個重要因素!


巴西名帥史高拉利,曾經執教過葡萄牙國家隊,係C朗嘅恩師之一。由於佢曾經執教廣州恆大,率領球隊贏得亞冠盃,對中國聯賽環境十分熟悉,佢近日就話,C朗曾經多次向佢詢問中超嘅情況:

「冇錯,佢問過我幾次喺中國嘅生活情況,我將所知嘅都同佢講晒。

我哋都明白,唔同球員對中國有唔同嘅印象。C朗有佢嘅品牌,咁中國就係一個市場。

呢方面中國就係世上最強嘅國家 (最大市場) 。我同佢講咗我一向嘅睇法,邊個得到呢個機會,都一定要去中國。」


冇錯,最大因素就係生意。C朗同一般球員唔同,天價人工已經吸引唔到佢,而佢一早已經經營自己嘅品牌,呢個亦係C朗一直打算經營嘅事業,如果佢嘅品牌能夠全面進軍中國市場,嗰份利潤一定遠遠吸引過天價人工。最近,傳出有中超球隊邀請巴塞球星恩尼斯達加盟,開出嘅條件同樣係幫助佢名下嘅紅酒莊打入中國市場,相信亦係基於同樣原理,如果乘著佢哋加盟,喺中國掀起一股「小白熱」、「C朗熱」,佢哋副身家真係暴漲唔知幾多倍。


Source: ESPN Daily Mail

留言


請按此登錄後留言。未成為會員? 立即註冊
    快捷鍵:←
    快捷鍵:→