【另類連中三元】一世難忘!韋根翼鋒入兩球,即被換出趕到醫院接生

睇足365 於 22/11/2017 發表 收藏文章
對於韋根翼鋒高哥洛夫 (Ryan Colclough) 嚟講,11月21日係佢最忙嘅一日,亦都係最神奇最難忘嘅一日。作為球員,冇乜嘢比起入波同贏波更值得慶祝,高哥洛夫不但做到,連喺球場外都一樣有喜事。


喺英甲第19場比賽,韋根喺主場對唐卡士打,身為前英超球隊嘅韋根,喺上半場30分鐘憑住對手祖爾胡禮嘅烏龍而領先1-0。去到上半場補時階段,22歲翼鋒高哥洛夫左路切入中路勁射省中人入網,令佢哋領先2-0返入更衣室。下半場出返嚟之後,高哥洛夫接應傳中,插水式頂入個人第二球,而佢喺入波2分鐘之後就即刻被換走,更加急急腳返咗入更衣室。

https://i.imgur.com/pXRVsYp.gif
https://i.imgur.com/cIMokXe.gif

有球迷開頭就覺得好奇怪,睇佢咁fit唔似有傷,點解會咁急即刻離開球場呢?韋根球會主席David Sharpe之後喺網上po咗張相恭喜佢,大家先知原來高哥洛夫咁急住走,係為咗即刻趕去醫院迎接啱啱出世嘅仔仔,佢仲趕到連波衫都未換!

loading


之後,韋根助教Leam Richardson話佢哋喺半場嘅時候收到電話,高哥洛夫太太穿咗羊水,呢個情況之下,高哥洛夫可以選擇繼續踼或者唔踢。不過好明顯,高哥洛夫選擇咗即刻出去完成任務,射入第二球,幫球隊奠定3-0勝局。助教Leam Richardson話:「佢一入完第二球,我哋就換走佢,因為佢嘅心思已經唔喺場上面。」

「我哋都係人,有啲球員會留低喺度,有啲會即刻去支持佢哋嘅伴侶,我哋尊重每一個個體嘅選擇。我哋所有人希望佢同家人一切安好。」

高哥洛夫本人都喺twitter貼相,話好開心球隊贏波兼可以迎接第二個仔嘅出世,加埋佢喺比賽入嗰兩球,就好似帽子戲法咁喎!

loading

Source: WiganTodayESPNDailyMailForTheWin

留言


請按此登錄後留言。未成為會員? 立即註冊
    快捷鍵:←
    快捷鍵:→