去季已自告奮勇提供球賽分析,摩連奴18歲仔疑加入紅魔教練團

睇足365 於 03/04/2018 發表 收藏文章
曼聯領隊摩連奴本身雖然識得踢波,但大家都知佢並非踢而優則教嘅人,反而係由巴塞隆拿擔任翻譯開始慢慢學習成為一名足球教練。隨住時代變遷,近年越嚟越多「學院派」足球教練冒起,亦多咗足球員喺年輕時有感自己喺職業球員路上發展有限,果斷早早開始學習成為教練,摩連奴囝囝好有可能係其中一分子。

摩連奴囝囝 Zuca ,正式名字係 José Mário Mourinho ,今年2月先年滿18歲,佢遺傳咗父親對足球嘅熱愛,自細已經學踢波,仲踢得唔錯,曾經因為父親工作緣故,效力過車路士同皇家馬德里等球會青年軍。司職門將嘅佢,16歲時憑自己實力與富咸青年軍簽下兩年合約,不過據《Daily Mail》報導,雙方喺去年已經達成解約共識,而喺富咸官網青年軍名單中亦搵唔到 Zuca 嘅資料。


啱啱個星期嘅英超比賽,曼聯成功擊敗史雲斯,其中一個場外焦點就係季後將會退役嘅隊長卡域克,已經身穿教練團大衣坐喺教練組入面,事後有人發現原來教練組入面仲多出一個人,就係「摩仔」 Zuca 。賽前,「摩仔」喺卡域克同摩連奴身後步入球場,隨後坐喺教練組之內。可能有球迷認為只係摩連奴帶埋阿仔嚟做 VIP 近距離睇下波,但留意下「摩仔」嘅大褸同長褲上面已經印有佢個名嘅簡寫「ZM」 (Zuca Mourinho) ,絕對唔係嘉賓咁簡單,而係職球員制服。


你又可能會話,吹水咩?18歲做教練?其實摩連奴之前已經講過佢個仔有為佢提供比賽分析,佢舊年喺葡萄牙電視紀錄片入面咁講:

「有一日,我哋經歷咗幾場唔好嘅比賽,佢拎住啲分析走埋嚟搵我。
好明顯佢見到爸爸工作唔順利,都覺得唔好過,當時我哋好似輸咗俾屈福特同曼城 (2016年9月) 。於是佢就拎住一啲球隊嘅數據嚟搵我。我之後拎俾助教同教練團睇,同佢哋講,你哋小心啲,呢個細路有一日會搶咗你哋份工。

我將佢同嗰個年紀嘅自己比較,我都會同樣嘗試為自己嘅爸爸做同樣嘅事,當然嗰陣係用另一啲技術方法,但佢當時只有16歲。」


上面提過,呢個係一個新趨勢,多咗年輕球員提早放棄喺職業球員方面發展,好早就去學教波。「摩仔」本身喺球員之路上唔算突出,但如果作為教練,有爸爸嘅經驗同人脈,機會已經多一般人一大截,直頭係贏在起跑線,仲要有得入紅魔學嘢,有咁嘅考慮絕對唔出奇啩!

Source: Daily Mail

留言


請按此登錄後留言。未成為會員? 立即註冊
    快捷鍵:←
    快捷鍵:→