加利佬:韋舒亞係「雙特」之後最強英格蘭中場

睇足365 於 16/01/2018 發表 收藏文章
曼聯同阿仙奴喺足球場上勢成水火,不過即使係咁,曼聯名宿加利尼維利都冇辦法掩飾佢對阿仙奴中場韋舒亞嘅欣賞之情,佢認為呢位阿仙奴青訓出品係現時最強嘅英格蘭中場。


韋舒亞年少成名,但佢近年一直未能擺脫「玻璃腳」嘅命運,曾經試過踢一兩場波就傷足一季,大大影響佢嘅發展。上個球季,佢被外借到般尼茅夫,不但喺少帥艾迪賀維手下,成為球隊組織核心,更重要嘅係有漸漸遠離傷患嘅跡象,曾經有大半季連續正選上陣,只係去到季尾先再次因傷缺陣一段時間,但並非以前嗰種嚴重傷患。今季佢返到阿仙奴,由盃賽輪換陣容慢慢重拾狀態,最近多場喺英超正選上陣,早前雖然再受輕傷,但證實並無大礙。


曾經出任英格蘭國家隊助教 (2012-16) 嘅加利尼維利,認為只要韋舒亞保持健康,「三獅軍團」必定應該選佢入隊,因為佢係現今最強嘅英格蘭中場。

「佢絕對係英格蘭最強嘅中場,仲贏成條街咁多。我喺國家隊工作嘅四年間,曾經同所有英格蘭中場球員共事,韋舒亞絕對有能力喺任何一支本土或者歐洲球隊入面立足,佢就係咁勁。

韋舒亞嘅問題係身體狀況、傷病同穩定性。如果佢可以每個星期都上陣,佢就係一個非常優秀嘅球員,佢嘅態度好好,努力訓練,而且擁有超卓嘅能力。

佢可以喺拎波嘅同時做半轉身,係唯一做得到呢樣嘢嘅英格蘭中場中球員。迪利亞里同巴克利都做到,不過佢哋踢得前啲,我當佢哋前鋒咁睇。

我唔會對佢或者阿仙奴有任何偏袒,因為我曾經同佢合作過,佢的確係一個優秀而有天賦嘅球員。當佢身體狀況好而且有好表現嘅時候,佢對於英格蘭國家隊嚟講係必須。」


「加利佬」又話,佢認為韋舒亞現階段的確未夠fit去證明自己,甚至話每一次睇到韋舒亞爭搶或者帶波帶多咗嘅時候,都好驚佢會斷腳,但係就強調佢嘅表現好好,只係身體狀況未夠穩定。

「佢嘅天賦係冇得質疑,對我嚟講,佢係我喺國家隊工作期間見過最好嘅中場球員,喺我第一年做助教嘅時候,謝拉特同林柏特都離開咗國家隊。」


Source: Sky Sports

留言


請按此登錄後留言。未成為會員? 立即註冊
  • Hoyin Ting123 於 16/01/2018 評論 NO. 1

    d球評不知所謂,搵件傻既做都得,基本係見工讚,見低踩。 我就一直撐太子上位,終於等到

  • Hoi Yin Leung 於 16/01/2018 評論 NO. 2

    可惜旁邊的沙加唔防守

快捷鍵:←
快捷鍵:→