前傑志教頭又「升呢」,任西悉尼流浪者主帥大打進攻足球 文字

睇足365於 01/11/2017 發表 收藏文章

有留意開本地波嘅球迷,一定記得邊個係甘巴爾(Josep Gombau)!呢位當年一手將西班牙地面傳控風格帶入傑志嘅前教頭,後來發展一帆風順,最近再次被委任為澳職球會嘅主帥,今次係近年成績唔錯嘅西悉尼流浪者。

西班牙籍嘅甘巴爾本身係「地上最強」嘅巴塞隆拿青訓教練,喺2009-10球季,佢獲得香港球會傑志嘅邀請出任主帥,當時成績唔係咁理想嘅傑志,希望呢位33歲嘅少帥可以將球隊全面改造,引入西班牙式嘅地面傳控風格。

結果喺2009-13年之間,甘巴爾幫助傑志奪得當時本地頂級聯賽港甲兩連冠 (2010-11 、2011-12)、足總盃兩連冠 (2011-12、2012-13),同埋聯賽盃 (2011-12),其中 2011-12球季更加係勇奪三冠王,而佢自己就兩次成為港甲年度最佳教練。佢喺2013-14球季人望高處,接受澳職球隊阿德萊德聯嘅邀請出任主教練,但傑志嘅風格直到今日仍然深受佢嘅影響。

(現任傑志教頭朱志光 [右三] 相信從甘巴爾身上獲益良多  圖片來源:傑志官網)

去到澳職嘅阿德萊德聯,雖然第一季球隊成績只係一般,最終喺10隊入面以第6位完成常規賽,季後賽首圈就俾中岸水手淘汰,但改善一隊波都需要時間。正如佢喺傑志一樣,球隊喺佢執教嘅第二季大有進步,阿德萊德聯上一次拎到錦標已經要數到2005-06球季拎到常規賽冠軍,而甘巴爾喺2014-15球季就幫球隊拎到足總盃冠軍,同埋打入季後賽四強,係球隊自從2008-09球季拎到季後賽亞軍之後最好嘅成績。



點知甘巴爾之後就毅然辭職就去美國做足球學校嘅青訓教練,再喺2016年成為澳洲U23國家隊主教練,之後仲做埋澳洲國家隊助教,可見佢嘅能力備受認可,而阿德萊德聯喺2015-16球季勇奪總冠軍,除咗佢繼任人、前巴塞球員阿摩 (Guillermo Amor) 之外,相信一手帶返隊波上軌道嘅甘巴爾都功不可沒啦!


喺最近,西悉尼流浪者就宣佈委任甘巴爾為新任球隊主帥。西悉尼流浪者雖然都算係澳職嘅生力軍,但自從2012-13球季第一次征戰澳職開始一直有好表現,5季之內3次打入總決賽,可惜每次都飲恨而回,不過佢哋就曾經喺2013-14球季拎到亞洲球會最高殊榮嘅亞冠盃冠軍。佢上任嘅消息更令球迷十分興奮。




呢個規模嘅球會相信對於甘巴爾嚟講會係一個新挑戰,而佢喺上任訪問中就咁講:「依家,我哋要開始一個新嘅時代。」

「我哋思考緊嘅係一個長遠嘅計劃,我哋會建立一個新嘅風格……我哋將會踢出球迷希望睇到嘅進攻足球。」


講到咁,估計甘巴爾會同佢喺傑志同阿德萊德聯一樣,花啲時間對球隊全面大改造,相信第二季開始就會有成績睇到,大家密切留意啦!

Source: Fox SportsGuardianA-league

留言

會員
我要評論
請按此登錄後留言。未成為會員? 立即註冊
  • Ngan Lok Fung
    Ngan Lok Fung 於 02/11/2017 評論 NO. 1

快捷鍵:←
快捷鍵:→