淺論雙紅會:曼聯對利物浦

車路士淺論 於 16/01/2017 發表 收藏文章
曼聯對利物浦這場雙紅會一向係英超既焦點大戰,加上近年兩隊都曾失色過失準過,而領隊上摩連奴(Mourinho)今季先入主,高普(Klopp)亦不過係第二季,而近期曼聯搵返狀態,利物浦今季亦一直係前列位置,雙方表現不俗令球迷頗有期待,佢地既發揮自然更加無疑係比賽焦點。


今場感覺雙方入局唔快,初段(筆者利申係13分鐘先開電視)係中場多,到近20分鐘先有多啲埋門。睇到曼聯攻勢比較多左路推進,可能係因為左路係面對小將,右路上對方左閘占士米拿(J. Milner)表現相對穩健,加上可以引空俾右路華倫西亞(Valencia)有空間壓上同米希達恩(Mkhitaryan)配合,但感覺未打到呢個feel,不過馬迪爾(Martial)腳法又幾好,都算幾有威脅。而12碼失球後,反而打到個勢,呢樣係令人欣賞既地方,無氣餒,更引到對方犯規造到幾次威脅。

而利物浦反觀雖然憑12碼領先,但打得唔算特別出色,球員確係投入,逼迫防守亦打得唔錯,但進攻配合就一般般。近期曼聯中場中三人都有轉換攻守既能力,雖然明顯普巴(Pogba)較前而另外兩人較後,但三人均肯跑動,利記中場搓唔到上去。而前線法明奴(Firmino)同拉蘭拿(Lallana)受制於近期幾好既組合鍾斯(P. Jones)同盧祖(Rojo),時不時有失誤。筆者季初亦講過曼聯可以一用盧祖,唔好擺死佢做閘,加上梳爾(Shaw)傷出又唔用白蘭特(Blind),都而家既達米安(Darmian),白蘭特就練下中場接卡域克班好過。

當然,不得不提今仗見米奴列(Mignolet)表現穩健左,曼聯失球後個勢唔錯,一度有幾下攻勢過左防線,但被米奴列化解,包括伊巴謙莫域(Ibrahimovic)既罰球同米希達恩一次左腳射門。下半場亦有球果斷出迎,避免左一球自殺式回傳造成失球。


下半場一開波利記打到兩腳,之後個勢又去返曼聯度,今次曼聯有一次打到引人到左路後轉邊,可惜馬迪爾接應唔到右路米希達恩傳中。雖然摩佬換走卡域克,打多個前鋒係前場壓迫,但曼聯打得幾有耐性,我差啲以為贏一粒既係曼聯,不過利記就等緊佢犯錯,不慍不燥既打法都無可厚非。利物浦都更加要咁,換入左古天奴(Coutinho),都梳理下前場進攻,更差啲一入黎就整球助攻,不過法明奴就射得曳。

係朗尼(Rooney)一腳躂Q後,馬達(Mata)入替,或者係想更多傳送俾中路進攻,利記右路既小將固然可以利用,安利簡(Erme Can)同中堅對中路保護都不足,有伊巴朗尼就當然有本錢試下入佢中路,試下追唔追到一球。之後曼聯都幾乎攻足十分幾鐘,米奴列都無發夢,包括救到朗尼82分鐘一次近射。不過到84分鐘一次朗尼傳中,入替既費蘭尼(Fellaini)頂中楣後,華倫西亞再傳,伊巴頂入追平。其實呢球都第遲,因為曼聯都枕住攻,但80分鐘後先比較入肉。尾段利記反而先至打到啲feel,搶返一輪,但鍾斯、迪基亞(de Gea)都無分心,守得住。


曼聯呢場明顯係唔夠把握力,大部分時間圍攻對手,雖然米奴列表現係穩健,但曼聯自己都有失色既地方,尤其明顯利物浦中前場發揮真係唔算掂檔,進攻上不及曼聯,但防守算不俗,就算右閘小將阿諾(Alexander-Arnold)雖有失誤位,但小將打大賽而言算唔差。曼聯防守都幾留心集中,但得益利記攻力失準。利物浦防守仍然有效,尤其米奴列keep到態,防守應無問題,但顯然進攻需得改善。至於兩邊領隊今仗既應對上,高普可能傾向微調,不及摩佬收後衛放前鋒咁明顯,但應該都係希望穩住一球優勢再博多球,可惜未能如願。一言以蔽之,其實兩邊進攻都要改善,不過一個係組織,一個係把握力而已。


多謝各位不吝賜評,一like一支持,多承指教:
https://www.facebook.com/chelsea.gor.sk
標籤: man utd  liverpool  

留言


請按此登錄後留言。未成為會員? 立即註冊
  • Gor SK 於 16/01/2017 評論 NO. 1

    越位但個下都要救既嘛⋯⋯btw無錢收,純興趣,但筆者都留心返啲盡量唔寫錯野,如有筆誤感謝提醒~

  • Gor SK 於 16/01/2017 評論 NO. 2

    越位但個下都要救既嘛⋯⋯btw無錢收,純興趣,但筆者都留心返啲盡量唔寫錯野,如有筆誤感謝提醒~

  • Ricky WTF 於 16/01/2017 評論 NO. 3

    工藤新一,我唔知個越位波如果唔計曼聯仲入唔入到,但重點問題係已經發生個既事係曼聯係靠球証誤判先汁返一分!!呢個係已經發生左既事實

  • Ricky WTF 於 16/01/2017 評論 NO. 4

    工藤新一!!我懷疑你真係戇撚鳩㗎. 我真心懷疑你係民建聯嗰啲無恥嘅成員 一撚樣唔撚用腦自己講完就當係真嘅 你用緊一啲假設性嘅問題同人哋一啲現實已經發生咗嘅問題嚟 比較, 我唔撚知曼聯之後會唔會唔入波, 但問題係未發生㗎嘛!!
    事實係你哋靠旁證 錯誤判決 先至死符碌執番一分, 我係你就匿埋喺屋企都唔撚出聲喇 邊會好似你咁撚好厚面皮出嚟牙斬斬出嚟扮曬魚蝦蟹㗎 面皮厚到之地殼咁

快捷鍵:←
快捷鍵:→