[來季前膽]車路士下季如果去蕪存菁?

車路士淺論 於 20/04/2014 發表 收藏文章
今季車路士發揮大部分時間都總係有d無力感,強強對壘表現好好,但一遇上主防既球隊就一籌莫展。另外,車路士既陣容都有不少問題需要補強,黎緊夏天轉會窗希望可以改善到情況。


首先,前鋒上問題都老生常談啦,我覺得清既要清我比較中意既費蘭,度托利斯(Fernando Torres),同埋丹巴巴(Demba Ba)恐怕都唔會留底,伊度奧(Eto'o)肯既都可以留,始終都係最具經驗既人選。而盧卡古(Lukaku)都證明到自己架啦,係愛華頓呢隊較高水平既球隊都有上佳表現,係時候返黎,而佢體力型踢法兼有不錯既技術,相信都摩連奴(Mourinho)岩既類型。而三個前鋒配置上,最後一個都要買個夠勁既入球機器返黎,個人非常唔建議買卡雲尼(Cavani),實在太貴,迪亞高哥斯達(Diego Costa)據講解約金只係3150萬,價格可以接受,而車仔鋒線上引援既逼迫性亦相信吸引到佢。


其次中場上我都係覺得要一個右翼,可拉邊可切入,或者買個傳送能力更好既打中路既攻中,梳理下進攻套路,根本現時三個攻中都係後上型,都無人俾到波,對主防既球隊真係俾人守死,夏薩特(Hazard)雖然係突破得最多、成功又多,傳送上都好,但佢都係後上射門既時候多,要買個人幫下佢、令佢更多空間發揮進攻能力。其實馬達(Mata)岩使,不過摩佬唔中意就無計。

另外,防中上除左馬迪(Matic)可以主防,要多個派牌型既。摩佬打防反,都要個人派牌分邊or俾直線、key pass,而家馬迪加大衛雷斯(David Luiz)可以有極高防守力,但對弱隊個陣馬迪主防已經夠做,要個派牌型控制下節奏,即係沙比阿朗素(Xabi Alonso)呢類。至於米基爾(Mikel)可以做到馬迪既替補,雖然佢向前傳球方面無乜貢獻,但防守上都唔錯,拉美利斯(Ramires)就…可以後備上陣,等對方無體力時用黎增加活力既,但呢兩個其實賣走都無乜問題。


後防問題主要係買個左閘,等阿斯比列古達(Azpelicueta)返右閘好d,梳爾(Shaw)其實真係要買,有排打,或者用貝查蘭(Bertrand)同Azp輪換都唔係唔得,但又要買個右閘後備。

而龍門真係放施治(Cech)留古圖斯(Courtois)會好d,後者既高峰期會長好多,不如將前者趁有市放走先,畢竟佢比以前都差少少穩健。

留言


請按此登錄後留言。未成為會員? 立即註冊
  • Billy Choi 456654 於 21/04/2014 評論 NO. 1

    基本上都認同,不過右邊有沙拿,要買就返個10號,ISCO,KROOS,艾歷臣等等,或者收返皮亞松,夏薩特細佬,防中有雲真高,馬迪,大衛雷斯,收返小麥,放走R7,M12

  • kaising 於 25/04/2014 評論 NO. 2

    Cech我認為可以留,事實証明龍門後備都要有相當既實力,對馬體會時傷左施治就睇到後備龍既重要性,其實以車仔一向長情心態,好多年紀大既都會留作後備(eg米基爾,艾殊利高爾),而且施治先31,講真表現暫時都算中上,應該值得留低

快捷鍵:←
快捷鍵:→