淺論黎緊英格蘭領隊既工作

車路士淺論 於 29/07/2016 發表 收藏文章
雖然大家都知英格蘭既領隊由艾拿戴斯(Allardyce)接任,但呢篇講英格蘭領隊既工作既文,筆者都係照講啦。英格蘭因聯賽、賽制、球會等既問題,影響球員質素等問題,筆者唔深入講,因為其實都唔少更專業既球評家已經深入剖析過,筆者只淺論以下幾點。


1. 陣式戰術

其實近年英格蘭既戰術同陣式,並無一個固定確立既套路or風格。自鶴臣(Hodgson)上任後,英格蘭既風格並唔清晰。2014年世界盃,當季利物浦發揮出色,勇奪聯賽亞軍,由於陣容有一定英人球員,鶴臣嘗試複製利物浦既戰術,但由於人腳發揮同配合不太理想,加上不適應戰術,英格蘭表現唔合格;今屆歐國盃,李斯特城憑強力防守及強橫鬥志,勇奪英超冠軍,鶴臣又將李城個一套搬落去,雖然防守戰術確實係合適,但恐防鶴臣並非意識到呢點,加上本來應該幾岩使、又唔浪費神射手頭兩名既一頂一快雙箭頭,偏偏又唔好好運用。新領隊需要盡快確立一套風格,係主攻、主守?係控球、防反?係簡單直接、細心組織?要先令球員適應,並按戰術挑選球員,而非一味將大牌球員全部召哂,夾硬放入一個套路度。


2. 人腳既挑選

頭先都講過,球隊確立風格陣式,先再挑選球員為佳,除非有某d球員表現大熟大勇,當然無棄用之理,到時就需要調整陣式,但如果真係完全唔夾,都唔可以因為一個人影響哂全隊發揮。好似西班牙咁,因為戰術上一直擅長地面組織,所以中鋒只有阿度列斯(Adruiz)一名高大中鋒作變陣強攻既奇兵,中場則挑選組織傳送為主既球員,而防中亦以擅長控制節奏既巴斯基斯(Busquets)為主力。英格蘭一直只按名氣同狀態,忽視戰術需要,最嚴重莫過於棄用真禾特(Drinkwater)而排出亞里(Dele Alli)、韋舒亞(Wilshere)、戴亞(Dier)呢個幾乎雙攻中同一個Box-to-Box既零防守既中場排陣。筆者認為英格蘭需要多d綠葉型球員,無乜名氣、但有戰術執行力同活力,同d"球星"互補,先可以發揮出應有實力,而非再屢屢大熱倒灶。


3. 朗尼既定位

其實英格蘭都唔少人因為打得既位太多,多到有時好lost咁,唔知打咩踢咩,不過朗尼(Rooney)貴為隊長,所以特別講一講佢。老實筆者覺得要剝佢個隊長章,佢或者有隊長需要既拼勁,但戰術定位不明既球員,上陣機會一定受影響,並唔適合作為隊長。而如果大Sam想照出朗尼,前鋒同攻中位實在太多人,而且狀態同年齡都有唔小既優勢,絕對係玩命。除非今屆摩連奴(Mourinho)將朗尼撳死係一個位,或者搵到非常適合既定位,否則重用朗尼依然有風險。


大Sam打法其實筆者唔算好熟,但佢絕對對戰術有要求,而且好明確係長傳急攻既傳統打法。其實如果佢夠魄力去做,可以整頓一下英格蘭既風氣,佢用人亦係果敢,不過d大牌服唔服就…不過至少戰術上,佢打開護級,歷黎保頓、韋斯咸等,防守上應有一定功力,係人腳質素更好下可能有效,加上主防同長傳急攻係呢段時間開始隱隱有抬頭跡象,而人腳上都算適合,尤其我提到既雙箭頭配合,如果大Sam肯作d微調,效果應該唔錯,佢當年曾經將唐寧(Downing)(唔好諗多)放係攻中,而且發揮都理想,佢今次都識做出類似既調整,英格蘭應該可以打得好好多。而佢雖然都有缺點,就有d固執既。

不過當然,好難差得過鶴臣。


多謝各位不吝賜評,一like一支持,多承指教:
https://www.facebook.com/chelsea.gor.sk
標籤: england  

留言


請按此登錄後留言。未成為會員? 立即註冊
    快捷鍵:←
    快捷鍵:→