干地下季要諗既問題

車路士淺論 於 28/03/2017 發表 收藏文章
近排好似冇乜講,今次筆者就講返車路士d野。如果今季呢,其實應該都無咩岔錯,問題都無咩好搞,如果平穩無咩大意外,應該都可以順利奪冠,理所當然,我地要講既睇既就係下季。作為領隊,干地(Conte)要煩既野都外,筆者就估下啦。


首先當然係戰術上既啦。其實我都有諗過呢個3-4-3陣式去到打歐聯掂唔掂,可能有d奇怪,因為打得好順,但出到歐洲賽場其實有好多唔同球風同唔同風格既球員,係英超打得順唔代表其他賽場都得。不過當然,轉陣其實好on居,夾左成季又唔打咩,干地應該會作出微調同補強返d弱點位。當然,進攻套路都需要改進,而家中場中路既創造力要靠法比加斯(Fabregas)在陣先得,否則基本要靠兩隻翼衛,一被守死就無得打,要夏薩特(Hazard)回後就變相前場少個人。要點樣解決中路攻守平衡係問題,相信要買一個攻守兼顧能力較強既中場搭簡迪(Kante)先有能力解決,從而增強出球點改善進攻套路。


講到買人,干地都要諗諗。除左上面中場中之外,係翼衛上,補充人手都需要,因為本來無呢個位,人手不足或唔適合,回收左艾基(Ake)做阿朗素(Marcos Alonso)後左路應該都ok(筆者傾向認為艾基定位係左翼衛),但右路就得摩西斯(Moses)一個,如果干地選擇進一步提升摩西既防守能力,希望摩西繼續做主力既話,多線作戰要買多一名翼衛先得。另一個方法係艾斯派古達(Azpilicueta)推返去右路,咁樣只要夾返既其實都唔錯,Azp體能亦屬充沛,速度略差,但防守技巧同企位都更好。另外,筆者認為艾拿(Aina)都有一定機會,不過要睇佢有無足夠表現說服干地。


引申落去,中堅位置都要換血同牽涉用人。來季基斯甸臣(Christensen)應會回歸,佢實力都不俗,應至少可以同蘇馬(Zouma)爭一個位,但二人爭既會唔會係Azp去邊路後既右中堅位就要睇,因為咁樣應會有效解決高空球應付乏力問題;否則既話,Azp應會繼續打右中堅,就要睇干地仲用唔用卡希爾(Cahill),因為此子經驗豐富,但踢法較保守、速度較慢,會係死症。而如果要提升戰力,就要收購個領袖型,搵個人領導指揮防線,大衛雷斯(David Luiz)穩左始終都仲係有d輕出,施治(Cech)走後古圖斯(Courtois)又未有足夠經驗能力去做指揮。


至於前場,干地要諗用唔用韋利安(Willian),否則佢一定走,雖然係巴西人,但佢既特點係跑動能力同體能,而非陣中前場所要既快速決定同小空間帶波既能力,反而我覺得摩西推前有機(其實我講過,唔細表)。筆者覺得可能韋利安可以做第二個摩西,提升返防守技巧都ok,因為一樣夠勤力又夠氣。另外干地都要小心選擇新中鋒,到底要哥斯達(Diego Costa)既替補定係競爭對手。替補要風格相近、又要肯打後備;競爭對手要有一定名氣,咁就夠料唔驚收哥斯達,而且風格有所不同亦可。而翼鋒都要為柏度(Pedro)等搵後備,否則體能應付唔哂咁多條戰線。


筆者預計一下下季個陣:

(Azp去邊)
龍門:古圖斯
後防:基斯甸臣(蘇馬)、大衛雷斯(收購既領袖型中堅)、蘇馬(卡希爾)
中場:艾斯派古達(韋利安)、簡迪(馬迪/查路拜)、法比加斯(收購既攻守兼備中場)、阿朗素(艾基)
前鋒:柏度(摩西斯)、哥斯達(替補/競爭對手)、夏薩特

(Azp唔去邊)
龍門:古圖斯
後防:艾斯派古達(基斯甸臣)、大衛雷斯(收購既領袖型中堅)、蘇馬(卡希爾)
中場:摩西斯(韋利安)、簡迪(查路拜)、收購既攻守兼備中場/馬迪(法比加斯)、阿朗素(艾基)
前鋒:柏度(摩西斯)、哥斯達(替補/競爭對手)、夏薩特

最後當然係小將問題,因為其實藍軍都有一定小將有質素,而且肯留低。觀乎干地今季應該都肯用小將,查路拜(Chalobah)、艾基都有一定機會,當然都要合用而風格適合球隊戰術。而下季多戰線下,到底應該買人提升戰力補充弱點,定利用空間提拔小將補充?呢個平衡點好難拿捏,干地應該都煩到底成績先定平衡埋發展先。而如果球員心態不正或有離心,點樣處理都重要,尤其佢地一定係小將既榜樣,有樣學樣頭痛既就唔止一個人。

Capture from 《蜘蛛俠:強勢回歸》(Spider-Man: Homecoming) 預告片(香港版中文字幕) ; Scene Source - Marvel Studio

講住咁多先,筆者已經講好長,再長驚1999,大家討論下就好,如有筆誤包涵一二。


多謝各位不吝賜評,一like一支持,多承指教:
https://www.facebook.com/chelsea.gor.sk
標籤: chelsea  conte  

留言


請按此登錄後留言。未成為會員? 立即註冊
    快捷鍵:←
    快捷鍵:→