一月轉會點樣執:車路士

車路士淺論 於 13/01/2017 發表 收藏文章
車路士今季表現一路勇猛,變陣後表現出色,一路高歌猛進,到上輪先俾熱刺壓制擊敗。轉打3-4-3後,利用翼衛解決邊路防守,同利用好中堅各自特點同人數;不過,都有唔少評論指出車仔進攻上比較倚重今季打返起既迪亞高哥斯達(Diego Costa)同夏薩特(Hazard),另外翼衛既人腳同風格都被指有進步空間。


今個轉會窗,干地(Conte)首個引援唔係買人,而係回收小將艾基(Ake)。艾基係多面手,中堅、左閘、防中都打到,呢個特點其實可以利用為佢走位自由度高,佢輪換做打左閘或者防中都得,可以為隊友補位,個人覺得佢頗有速度,應該打翼衛,防中上馬迪(Matic)同簡迪(Kante)難以動搖,加上仲有法比加斯(Fabregas)、查路拜(Chalobah),而翼衛人腳反而有限,應該打翼衛居多。雖然亦有傳出車路士對列上度洛迪古斯(R.Rodriguez)等有力打翼衛既球員有興趣,但其實就算收購,都不急在一晰,因為夏天一定會有清洗,如卡希爾(Cahill)等表現唔算好好,甚至有時略差既球員,到時順利有返歐聯資格,先買返人增厚深度,加上基斯甸臣(Christensen)等小將回歸,就足以應付不同戰線。如果今冬就買,艾基就應該打中堅,視乎干地點樣引援,但以艾基約1.8米高、71公斤,比筆者稍高同稍重,打中堅似乎唔夠。


筆者比較希望係右路會有新人,因為摩西斯(Moses)雖然勤奮,但防守能力始終有限,如果干地無意收購中堅(或買左翼衛用艾基打中堅)既,艾斯派古達可以打返中堅,之後睇干地想起用艾拿(Aina)定收購一名可以做主力既右翼衛。(由於講到口臭,筆者不提古亞達度(Cuadardo)了) 筆者比較希望買人,代替摩西,同用艾拿做輪換,摩西就推上前,同韋利安(Willian)、柏度(Pedro)、夏神輪換,始終佢翼鋒出身,進一步釋放佢進攻能力好過。


不過中鋒方面,據稱係有意簽洛蘭迪(Llorente),筆者就唔明白,明明有個巴舒亞伊(Batshuayi)係度唔用,而且亞伊有一定身體質素同靈活性,唔用都怪,仲買個作用較單一、更老既前鋒而唔用佢,就摸唔著頭啦。雖然可以好似阿仙奴用基奧特咁,但巴舒亞伊都做到同一作用,如果買就太怪,如果係買一d好似夏神或者之前傳過一陣仔既山齊士(A.Sanchez)一類小快靈既前鋒,互相配合拉位打小組織,反而更合理同打到多d變化。


今次講到呢度,下次到又係打得好好既利物浦。


多謝各位不吝賜評,一like一支持,多承指教:
https://www.facebook.com/chelsea.gor.sk
標籤: chelsea  

留言


請按此登錄後留言。未成為會員? 立即註冊
  • 數據就是事實 於 14/01/2017 評論 NO. 1

    前面火力夠,要買似乎都係防守向掛?

快捷鍵:←
快捷鍵:→