《我會繼續留效車路士 直至球會唔再需要我 - 韋利安》

BluexLion車迷手記 於 04/03/2018 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : CHELSEADAFT

城車大戰前夕,韋利安接受左sportv既訪問,並再一次指出自己一直都係想留效車路士,完全無諗過離開,會直到球會唔需要佢。巴西人近期狀態非常火熱,可以話一次又一次用表現去說服部份「反安派」既車路士球迷,其實每支球隊都希望擁有韋利安這類型球員,你又知道嗎?

當日藍軍從同市死敵熱刺手中將韋利安搶過來,時任主帥摩連奴對巴西人非常器重,原因係睇中佢擁有「無限體力回防」哩一點,就好似長氣袋一樣全場時間跑上跑落,無論進攻定係防守都會鍥而不舍咁參與,體力永遠無用完既時候,對於過去愛好使用工兵既摩連奴黎講,哩位球員特性絕對係好洗好用,而韋利安亦甘心放棄過去喺薩克達所擁有既創造力,成為摩帥手中的猛將。

但對於車路士球迷黎講,韋利安令佢地感到百感交雜,又愛又恨。自巴西人加盟以黎,一直都確保到正選席位,間接排擠了馬達、舒爾尼、沙拿等一眾球迷愛好既球員。「契仔安」、「韋大帝」等名字相繼出現,挪揄佢永遠都唔能夠喺應射則傳,應傳則射既時間做好處理,更有「進攻黑洞」之稱。話雖如此,但韋利安總能夠喺球隊整體表現唔好既時候擔大旗,以身作則為車路士搶得一分得一分。

講緊既就係前季,可以話球隊喺近年黎最意志消沉既一季,前線攻門乏力以及防守不穩。在攻擊線上,隊友迪亞高哥斯達、夏薩特狀態持續不穩及低迷,此時巴西人就揹起大部份進攻既責任,而且交出不俗既表現,其中罰球直接得分更加係佢既殺手鐧,先後射破唔少龍門既十指關,當中更包括前皇馬門將卡斯拿斯(Iker Casillas)。韋利安亦有表示花左唔少心血同時間喺訓練罰球之上,此舉為車路士無論喺聯賽抑或歐戰上都搶番唔少分數,可以話盡力拯救垂死掙扎既藍軍以及當時帥位嚴峻既摩連奴。

盡管如此,一己之力亦未能為車路士死而復生,摩連奴最終也逃不過下課既命運,更接掌下一任曼聯帥印。雖然傳出會將韋利安成為引援目標之一,但球員多次公開向車路士表明心跡,最終轉會亦只聞樓梯響;自干地上任後,已經沒有當時摩連奴既「鐵一般」正選位置,依加更需要比起當時努力、堅持信念去爭取意大利人給予既上陣時間,而到近日對陣巴塞及曼聯時,韋利安都成功爭取得到以好表現回饋干地及一眾球迷。

也許韋利安既技術未係隊中最出眾,但論忠心的話絕對係球隊中數一數二,亦係每支球隊所希望擁有的。


來源 : sportv

文章最後更新時間 : 04/03/2018 10:30

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  韋利安  干地  摩連奴  

留言


請按此登錄後留言。未成為會員? 立即註冊
  • Karl Li 於 04/03/2018 評論 NO. 1

    古天奴當日都話要成日利記傳奇,現在身在何處,今時今日忠誠何價?

快捷鍵:←
快捷鍵:→