中場只淨下法比加斯可供選擇 車路士對陣屈福特屬背水一戰?

BluexLion車迷手記 於 21/10/2017 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

沉日先打完對羅馬既賽後分析,話咁快今晚七點半早場,車路士就會再喺主場迎戰屈福特,後者喺積分榜既排名更比藍軍高一位,而干地在賽前記招已告知中場位置可能得番法比加斯一位作選擇,今場必定是一場背水一戰既硬仗,在人手緊絀之下應如何怖陣排兵?小弟在本文作大膽假設。
.圖片來源 : The Citizen

上場對陣羅馬時,頂替簡迪為防守中場既大衛雷斯在下半場傷出,而巴卡約高在賽後亦同樣確定受傷,雖然兩者有參與對陣屈福特既賽前操練,但干地會否冒風險派佢地上場亦係未知之數,而另一中場傷兵,季初由李斯特城轉投過黎既真禾特亦開始進行單獨及參與少量全體訓練,由於英格人狀態尚未完全恢復,相信佢既出場機會會比前兩者更低。
.圖片來源 : Metro

換句話說可供干地選擇既中場人手,就只淨下法比加斯以及一眾年輕小將,人手不足既情況基本上已經去到「危殆」級別,咁究竟邊個會成伙拍法比加斯出任對陣屈福特既中場人選?先假設大衛雷斯以及巴卡約高同樣不能正選或先退居後備席以及排除一眾年輕小將,小弟認為隊中可以調任到中場既人選就只有一位。
.圖片來源 : Evening Standard

哩個就係基斯甸臣,喺上場對陣羅馬之前,哩位丹麥守將表示干地已經要求佢喺訓練當中擔任唔同位置作備用之選,同時間基斯甸臣之前外借慕遜加柏期間其實都有出任過防守中場,如果單純喺三後衛之前處理防守工作的話,對佢絕對係有信心的,相信佢唔會再犯上場對住迪斯高既失誤,但如果要負責起中場串聯以及後上助攻鋪橋搭路的話,就將番個波交番比法比加斯發辦更為理想。
.圖片來源 : The Guardian

但有個問題就係,本身係中後衛既基斯甸臣,佢哩個位置會由誰人取替?上場大衛雷斯傷出後,干地並沒有立即將基斯甸臣調任到防守中場,反而換入柏度並轉陣至343,哩個大膽既臨場調動就差啲令球隊由三分變零分。同時間見到干地對於中後衛哩個位置既執著,哩個位置開季至今人選就只有兩名,大衛雷斯以及基斯甸臣,能夠勝任其位既主因都係因為兩為球員都擁有用波能力。
.圖片來源 : We Ain't Got No History

如果今場真係將基斯甸臣調任中場,中後衛哩個位置最有機會出任既人選就係魯迪加或者加利卡希爾,雖然兩者長傳助攻方面準繩度不及大衛雷斯,但至少都有能力做到哩一方面既野,對於戰術既影響減到最低,而且魯迪加近兩場為球隊上陣時間就只有13分鐘,對水晶宮時未有上陣而對舊主羅馬時亦只係後備上陣,體力上絕對有能力為今場波既正選。
.圖片來源 : Live.Sport.News

只於其他位置相信都有合適既正選球員擔當,依加車路士最完好無缺既暫時就係攻擊線上面,而除左中場之外下一個最有風險既位置就係翼衛方面,希望干地安排番恰當既輪換比番馬高斯阿朗素,就算冒著風險將堅尼地後備入替哩個位,比前者休息都係值得的,否則左翼衛哩個位置受傷既影響絕不下於中場。

背水一戰,破釜沉舟,能否終止聯賽連敗記錄就睇今場。

文章最後更新時間 : 21/10/2017 09:15

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  屈福特  干地  

留言


請按此登錄後留言。未成為會員? 立即註冊
    快捷鍵:←
    快捷鍵:→