那些年離開的藍血人 如果遇上干地

BluexLion車迷手記 於 09/02/2018 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

**事先聲明 - 哩篇文既主題全屬幻想(即係FF)

車路士近年被外界認為,放走了不少好球員,想探討一下部份離開既球員,能夠適應干地既戰術嗎?

12-13
史度列治 (Danny Sturridge)
轉會至:利物浦 現效力:西布朗(由利物浦外借半季) 領隊:柏祖
當年既史度列治獲得唔少出場機會,出任球隊邊路攻擊位置,可惜一直搶唔到佢心儀既正選中鋒,而轉會至利物浦,及後與蘇亞雷斯同史達寧合組3S,鋒線攻力同級數絕對可以媲美於今季曼城。但自從熱血教頭高普接掌紅軍帥印後,因戰術理念未太合適導致史度列治經常坐在後備席上,加上球員本人傷患紀錄不斷遞增,岩岩哩個冬季轉會窗最終都外借至西布朗;在迪亞高哥斯達離開後亦有少量吹水新聞,指當時缺乏英人既車路士有興趣買番佢,但即使干地選用雙前鋒,亦有更多選擇比哩位利物浦前鋒好。與其回想史度列治,倒不如比番個機會巴舒亞伊更為理想。

13-14
馬達 (Juan Mata)
轉會至:曼聯 現效力:曼聯 領隊:摩連奴

兩屆球會中MVP亦是受萬千車路士球迷寵愛既球員,同時為車路士爭奪得各項錦標,但因不乎合摩連奴二期防守迫搶標準,而被葡萄牙人清洗至曼聯。轉會後出任不同位既攻擊位置,即使攻中位先係馬達最拿手既位置,而球員場內場外既表現好快奪得曼聯球迷歡心;再望番依加既車路士,望到夏薩特果種力不從心,藍軍正正缺乏左一個好似馬達哩類型能夠在邊路造波既球員,而且佢同「夏世三」夾慣夾熟,即使球隊岩岩冬季轉會窗買左巴克里,但情感與現實黎講車路士都好需要馬達回歸。

14-15
迪布尼 (Kevin De Bruyne)
轉會至:禾夫斯堡 現效力:曼城 領隊:哥迪奧拿

現時成為曼城進攻核心之一既迪布尼,可以話用表現狠狠地摑了車路士一巴。當時還身在車路士既佢,認為自己應當正選十一人,可惜以位置來說,時任領隊摩連奴認為佢未達標,應付出更多去爭取正選機會。在雙方都不願讓步之下,迪布尼選擇離開車路士重番德甲加盟禾夫斯堡。當然去到禾堡被安排正選既佢發揮得非常好,並且好快成為左歐洲球壇注目既攻擊球員,亦都吸引左曼城既目光並且收歸其下。無論要佢踢邊、攻中,什至係無鋒陣既偽前鋒,質素都相當不俗,相信未來會繼續發熱發亮。依加迪布尼絕對有能力挑戰車路士任何正選攻擊位置,但係佢已經喺曼城成為核心,有必要重回舊地証明自己嗎?

13-14
盧卡古 (Romelu Lukaku)
轉會至:愛華頓 現效力:曼聯 領隊:摩連奴

當時以「新杜奧巴」之名登錄英超加盟車路士,外借至西布朗及愛華頓時都有出色表現,而後者更以球會破記錄既轉會費收購,哩單交易可以話係三贏,始終盧卡古並非跟杜奧巴性質相同既前鋒,喺當時既車路士戰術體系的確發揮唔出球員最好既一面。到上季一整個賽季,佢都係跟車路士連上關係,而依加既盧卡古仲適唔適合車路士?對比番離開前同這一刻,表現談得上有進步,始終之前愛華頓以佢作為核心,唔少球員都會餵波比佢,頭頂腳踢,當中亦偶有浪費了既機會。對於依加既車路士?其實佢同莫拉達都一人去左一間,車路士暫時都無需要要佢。

14-15
舒爾尼 (André Schürrle)
轉會至:禾夫斯堡 現效力:多蒙特 領隊:施特格

一名因為防守表現不合乎領隊要求既球員,而背上失敗之名離開藍橋。登陸藍軍初期既舒爾尼,球迷抱著唔少期望,畢竟德國人總是有紀律、效率型,而佢亦喺球隊面對失分時刻,以後備奇兵既身份挺身而出,為車路士搶番唔少分數。舒爾尼踢法機動,即使無球在腳亦會配合隊友走位,製造機會;但佢並非一名攻守兼備既球員,而時任領隊摩連奴注重防守迫搶,即使係攻擊球員亦需要分擔防務工作。而戴著世界盃冠軍以及關鍵助攻光環既舒爾尼去到第二季,表現不但未及上季搶眼,更喺關鍵時候導致球隊失波,及後急於表現自己,亦浪費左球隊唔少入波機會,可以話進退失據。最後變成球隊收購古亞達度既籌碼,總結佢既英超生涯可以話係高開低走,相信當時唔少球迷對佢既離開感到可惜。如果活在依加車路士既體系,相信佢更為合適,始終球員戰術執行力強,干地亦有條理地安排場上十一人既職責,而且舒爾尼配合走位程度不下於柏度,無球走動既活躍程度相比其他球員為高,佢既存在可能會迫使韋利安到右翼衛發展,即使佢近年多受傷患困擾。一切只因時機不合,或許這是叫有緣無份。

15-16
菲臘比路易斯 (Filipe Luis)
轉會至:馬德里體育會 現效力:馬德里體育會 領隊:施蒙尼

與迪亞高哥斯達同時加入車路士,並繼承傳奇左閘艾殊利高爾3號波衫既菲臘比路易斯,以助攻力強為名。佢既加盟明顯係為球隊多線作賽做準備,可惜既係現實並非如此,相比於左右閘既艾斯派古達和伊雲奴域,菲臘比路易斯出場既機會少之又少,大部份時間都係喺後備席上留守,即使後備上場亦明顯狀態不足,表現與效力馬體會時期什有落差,而球員亦有公開表示喺藍橋過得唔開心,最終也選擇離開。如身處在干地既三後衛陣式當中,左翼衛絕對係佢既理想位置,相比於馬高斯阿朗素,進攻力當然係菲臘比路易斯優勝,反而防守力以及身體對抗性不足係佢既缺點,而且球員似乎亦唔太適應英超既節奏。

每個球員當年都有著唔同既理由離開,依加亦都喺所屬既球會有著一個重要既地位。當佢地有機會再次踏足藍橋的草地上時,即使穿上了唔同顏色既球衣,亦會受到主場球迷既掌聲歡迎。

下集 《那些年離開的藍血人 如果遇上干地(下)》
文章最後更新時間 : 09/02/2018 17:00


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

留言


請按此登錄後留言。未成為會員? 立即註冊
  • OhMyGirl_Arin 於 09/02/2018 評論 NO. 1

    除左迪布尼可惜d之外 其他就算數啦

快捷鍵:←
快捷鍵:→