《破釜沉舟》干地的第一次九人應戰

BluexLion車迷手記 於 13/08/2017 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

相信沉晚唔少睇住直播既球迷都過左一個難忘之夜,車路士以應屆英超冠軍身份主場迎戰般尼,藍軍最終在9人應戰底下以2-3獲得聯賽第一場敗仗,當中過程亦見得到球隊既高山底谷,黎緊今季既車路士究竟會係點?就先由今場講場。
.圖片來源 : FOX Sports Play Asia

夏薩特、巴卡約高以及柏度繼續因傷避戰,而摩西斯因上季足總盃決賽一面紅牌而需要停賽,受制於人手所限,干地派出年輕小將保加作邊路攻擊球員正選,而新加盟既魯迪加就取代艾斯派古達為右後衛,後者就為右翼衛。開波3分鐘馬高斯阿朗素經已得到今場第一面黃牌,同時已經睇到球証對於藍衫既球員吹罰非常嚴厲,意想不到既係到左14分鐘,貴為新任隊長既卡希爾一下「自爆推甩再剷腳唔中波」,換黎今季英超第一面紅牌,就知道今場並不好受。
.圖片來源 : The Sun

本身喺先前既文章都有講到大衛雷斯同卡希爾都係速度屬性較慢既球員,而且本身波底並唔係特別好,今次隊長仲要帶球推進到中前場位置,意外地推甩腳後再作攔截,換黎既代價相信佢亦不好受。及後時間法比加斯亦因面對球証「拍手」被罰黃牌,埋下左今場尾段既伏線,由於後場少了一人,以守先既前題下干地換入基斯甸臣取代攻擊球員保加,而般尼繼續以左右兩邊大腳傳中既掘入式踢法希望打破決口,入球好快喺上半場接二連三出現。
.圖片來源 : Sky Sports

第一個失球禾基斯射後撞到大衛雷斯而改變方向入網,運氣元素佔左好大部份。而第二球係喺般尼左邊路一個罰球,由於車路士右路前場打少一人,右翼衛既艾斯派古達亦針對防守禁區外既般尼球員,但估唔到對手並唔係大腳掘入禁區,禾特同隊友撞牆後已經深入起腳地帶射門破網。至於第三球繼續係由對手大腳傳中頂入,今次大衛雷斯亦無緊迫到禾基斯同時漏頂下比對方門前頂入,導致般尼帶住三球優勢入更衣室。
.圖片來源 : Mirror

其實車路士喺未破蛋之前都有好多反擊機會,但係都好大部份都被巴舒亞伊浪費左,喺陣式同打法都大致與上季相同之下,後者明顯唔能夠負上迪亞高哥斯達既職責,將一啲中後場傳上黎既波作分邊用,尤其係高空波,一接落黎好多時都已經去左對手腳下,基本上好多攻勢都係喺佢身上斷左,可能就係因為咁上季喺干地手中並得唔到太多機會,巴舒亞伊仲需要時間去提升自身能力同了解戰術方針。
.圖片來源 : Sumairy

直到59分鐘被莫拉達換入,西球牙人可以話將激活番藍軍既攻擊線,喺落場10分鐘既時間好快收到成效,接應左韋利安既傳中頂入,哩球可以話見到莫拉達既門前把握力,其實由上場經已發現韋利安比較鐘意製造機會比莫拉達,兩者配合出黎既化學反應亦都好快比大家見到。之後亦都有基斯甸臣右路插上射門,但莫拉達被判越位入球無效。直到完場前艾斯派古達大腳掘上前線,再由哩位前皇馬前鋒二傳比大衛雷斯射入。單單落場半個鐘已經製造左唔少攻勢,亦都直接同間接為球隊追上接近既比分。
.圖片來源 : Mirror

至於新加盟既魯迪加同回收番黎既基斯甸臣亦都交出唔錯既表現,前者上半場喺右路交出好幾下長傳到前場,當然頻率以及準繩度未有大衛雷斯咁高,但至少哩項能力可以喺藍軍失去巴西人上陣時可以繼續擁有。至於基斯甸臣在中途換入表現亦十分穩定,可以話比隊長卡希爾更能夠保持鎮定,黎緊後者停賽相信會獲得既機會更多,什至有機會取代成為正選亦不足為奇。
.圖片來源 : We Ain't Got No History

雖然獲得一場敗仗,但球隊在九人應戰底下交出既表現可以話絕對收貨,球証喺尾段交出第二面既黃牌比法比加斯有值得斟酌既地方,干地賽後沒有過份針對球証既判決不公,球隊只會繼續盡力做到最好既一面出黎。然而喺今場之後相信球員們都經歷左一場刻骨銘心既比賽,黎緊下一輪既賽事將會係下星期日對陣熱刺,喺今場兩位紅牌既停賽下有摩西斯復出,先不論球隊喺哩一星期有冇新球員加盟,球迷最想睇到既係即使車路士幾咁天殘地缺,只希望繼續表現得到藍色鐵血精神。

Come on Chelsea!

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 干地  車路士  

留言


請按此登錄後留言。未成為會員? 立即註冊
  • Albert Lam 於 13/08/2017 評論 NO. 1

    希望真係球會可以比多d support干地。由上半場球員情緒失控,15分鐘休息時間就可令班球員專心踢波,重追到2球。

  • Marjill 於 13/08/2017 評論 NO. 2

    其實巴舒比雷米廢好多

  • somewhere 於 13/08/2017 評論 NO. 3

    阿朗素果腳你話嚴,不如話佢出腳危險, 法比果腳完全係鞋底向人仲要中哂腳,嚴d直紅埋你

快捷鍵:←
快捷鍵:→