《大勝背後的陰霾 - 是巴卡約高的迷失?還是干地的執著?》 文字

藍獅於 13/02/2018 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

.圖片來源 : ChelseaFan12

一場大勝絕對對於近況不佳既車路士黎講有正面作用,始終藍軍近兩場聯賽都全失三分,更以大比數被擊敗,今場力保不失可以話能夠先止止血。但在一洗頹風背後,有一位球員正正係喺哩場賽事上無出過場,就係今次想講既主角,被停賽既巴卡約高。

上場聯賽時,巴卡約高只係踢左半個鐘就兩黃一紅被逐,導致球隊在整場比賽長時間打少一人,埋下大敗既伏線,災難性表現更令當地球迷即場高唱"You fxcking shit~",可以話成為眾矢之的。在今場停賽下,球隊表現雖然未稱得上優秀,但至少有好轉跡象,讓球迷更加之加深對巴卡約高既「壞印象」。但在馬後炮及理性討論下,戰績失利真係只怪罪於法國人身上?

「錯就要認 打就企定」,無可否認既係巴卡約高個人技術係有問題,之前都有講過哩位法國中場既弊病非常明顯,每次佢拎波後都會推腳,而唔係以護波為主,皮球與腳之間距離過遠,導致唔少對手都能夠喺佢背後「打荷包」,而隊友簡迪即使能夠覆蓋更多海洋面積,都唔能夠話萬無一失;再講,無理由企喺場邊既干地睇唔到有哩個問題,自巴卡約高加盟後一共為車路士在聯賽上陣24場,其中只有4場係後備上陣,睇得到佢喺意大利人心目中有一定位置。

但干地將一個唔穩定既「中場炸彈」放到場上,其實除左害左球隊之外,間接亦傷害埋球員自己本人,巴卡約高明顯對於英超既節奏以及裁判既執法標準依然唔熟悉,與此同時球隊亦進入調整期,多個位置既球員都未必能夠發揮得出上季奪冠既穩定表現,亦關係到由於球隊中沒有替補,引致個別位置既球員在缺乏休息既情況下仍然需要上場,影響得最深遠既必定係翼位哩個位置。

其實由上季什至更之前喺祖雲達斯或者意大利國家隊都睇到,干地手中既三後衛陣式係好依賴翼衛既發揮,無論喺攻守兩方面以至體力同速度上,各方面都需要擁有優勢接近全能球員,而隊中既摩西斯同馬高斯阿朗素在各方面都有利有弊,干地在補強上希望引進番好似阿歷士辛度哩啲再高一層次既翼衛人馬,但高層又唔肯出番相對應既價錢最終又唔成事,最終就只有薩柏哥斯達同艾馬臣加盟,級數上絕對有分野。

唔係話幫住巴卡約高,只係球隊整體表現唔好,除在場上踢緊果班球員之外,領隊、球會高層什至有其它因素都會影響到全隊發揮,互相牽引。希望干地能夠以哩一場比賽作借鏡,重新審視戰術人腳安排,以及好好為巴卡約高既能力作針對性訓練,至少希望比球迷見到佢每場波都有進步,咁先至係架嘛。


文章最後更新時間 : 13/02/2018 17:00


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  巴卡約高  干地  
【球迷世界 X Futbol Trend 睇波之夜 — 曼車大戰】

留言

會員
我要評論
請按此登錄後留言。未成為會員? 立即註冊
  • 4466hk
    4466hk 於 13/02/2018 評論 NO. 1

    有傳巴卡約高並非干地要買,而係「高層」買既,唔知有幾多成真?如果係真,話唔完成日出既原因,就可能係高層指定了,我並非車迷,不是傳聞孰真孰假,要請各車迷定斷。

快捷鍵:←
快捷鍵:→